एजेन्सी – लियोनेल मेस्सीको कप्तानीमा रहेको इन्टर मियामीले सपोटर्स शिल्डको उपाधि जितेको छ।

एमएलएस अन्तर्गत बुधवार भएको खेलमा कोलम्बसलाई ३-२ गोलअन्तरले पराजित गरेसँगै मियामीले सपोटर्स शिल्डको उपाधि जितेको हो।

एमएलएसमा उत्कृष्ट प्रदर्शन गर्ने टिमलाई सपोटर्स शिल्डको उपाधि दिइने गरिन्छ । यो सिजन राम्रो प्रदर्शन गर्दै शिर्ष स्थानमा रहेको मियामीको यो पहिलो सपोटर्स सिल्ड उपाधि समेत हो ।

खेलको ४५औं मिनेटमा मेस्सीले गोल गर्दै मियामीलाई सुरुवाती अग्रता दिलाएका थिए । पहिलो हाफको इन्ज्युरी समयमा मेस्सीले गोल गदैं अग्रता दोब्बरको बनाए ।

कोलम्बसका लागि ४६औ मिनेटमा डिएगो रोसीले गोल गर्दै टोलीलाई खेलमा फर्काउने प्रयास गरे । त्यसको दुई मिनेटपछि नै लुइस सुआरेजले गोल गर्दै मियामीको अग्रता ३–१ मा पुर्याए ।

६१औं मिनेटमा जुआन हर्नान्डेजले पेनाल्टीमा गोल गर्दै कोलम्बसलाई ३–२ को स्थितिमा ल्याए । ६३ औं मिनेटमा रुडी कामाचो दोस्रो पहेंलो कार्ड खाँदै मैदानबाट बाहिरिएपछि कोलम्बस १० खेलाडीमा सिमित भयो । त्यसपछि कुनै टोलीबाट गोल हुन नसक्दा खेल मियामीले जित्यो ।

३२ खेलमा ६८ अंक जोडेको मियामी एमएलएसको लिगको शीर्ष स्थानमा रहेको छ । दोस्रो स्थानको कोलम्बसको ३१ खेलबाट ५७ अंक रहेका छ ।