दिउँसो २:१४ बजे

सिस्नेरी एकेडेमीमा रहेका केहि खेलाडीहरूको परिवरका सदस्यहरू अहिले एन्फा मुख्यालय सातदोबाटो पुगेका छन् । उनीहरूले छिटो उद्दार गरिदिन अुनरोध गरिरहेका छन् ।

दिउँसो १:५१ बजे

एन्फा महासचिव किरण राई – ‘सिस्नेरी एकेडेमीबाट सुरक्षित स्थानमा रहेका बलकहरूलाई काठमाडौं ल्याउनका लागि हामी प्रयासरत छौं । रक्षा मन्त्रालयसँग पनि कुरा भइसकेको छ । उनीहरूलाई काठमाडौं ल्याउनका लागि हेलिकप्टर नै प्रयोग गर्नेछौं । अहिलेसम्म हेलिकप्टर उड्न सकेको छैन । यसको लागि नेपाली सेनासँग पनि सम्पर्क गरिसकेका छौं ।’

दिउँसो १:३६ बजे

‘सिस्नेरी पहिरोमा बेपत्ता भएका ६ बालकको परिवारलाई जानकारी गराउने काम भएको छ’ – एन्फा महासचिव किरण राई। यो घटनाको विषयमा एन्फाले केहि बेरमा प्रेस विज्ञप्ति जारी गर्दैछ ।

दिउँसो १:३० बजे

‘एकेडेमीका बलकहरू मात्र पहिरोमा कसरी परे ? होस्टेलका जिम्मेवार व्यक्तिहरूले ध्यान नपुर्याएको हो की जस्तो मेरो सुरूवाती बुझाई हो’ – राखेप सदस्य सचिव टंकलाल घिसिङ ।

समय दिउँसो १:१५ बजे

राष्ट्रिय खेलकुद परिषदका सदस्य सचिव टंकलाल घिसिङले घटनाको जानकारी एन्फा महासचिव किरण राईले गराएको बताए। जानकारी पाएलगत्तै युवा तथा खेलकुद मन्त्री तेजुलाल चौधरीलाई जानकारी गराएको सदस्य सचिव घिसिङले बताए । मन्त्री चौधरीले गृह मन्त्रालय र रक्षा मन्त्रालयमा उद्दारका लागि पहल गरिसकेको जनाएका छन् ।‌

दिउँसो १:०८ को अपडेट

मकवानपुर जिल्ला फुटबल संघका अध्यक्ष टीका राम लामाका अनुसार बेपता भएका ६ बालकको नाम

१. अनुप घलान,हेटौंडा

२. साइमन योञ्जन, मकवानपुर

३. आदित्य बलपाकी, सर्लाही

४. रियान्स आचार्य, काठमाडौं

५. बिकल रेग्मी, बारा

६. दिवस बानिया, मकवानपुर

दिउँसो १२:५७ को अपडेट

एन्फा सिस्नेरी एकेडेमीका ६ खेलाडी शुक्रबार साँझदेखि बेपत्ता । सुरक्षित स्थानमा सार्ने क्रममा ६ खेलाडी पहिरोमा परेका थिए ।

एन्फाले सञ्चालन गरेको सिस्नेरी एकेडेमीको कोटा २५ जनाको हो । हिजो एकेडेमीबाट सुरक्षित स्थानमा जानेको सङ्ख्या यकिन हुन सकेकेो छैन । एकेडेमीमा ३८ देखि ४० जाना रहेको बुझिएको छ ।

एकेडेमीबाट सुरक्षित स्थानमा गएका करिब ३० जना एकेडेमीका खेलाडीहरू एक शिक्षकको घरमा बसिरहेका छन। उनीहरूलाई सुरक्षित स्थानमा पुर्याउन समेत समस्या भैरहेको छ । एन्फाले हेलिकप्टर नै प्रयोग गर्न कोशिश गरिरहेको जनाएको छ ।

एन्फाबाट एम्बुलेन्स सहित सिस्नेरी गएको टिम बल्खुबाट अगाडि जान सकेन । सिस्नेरी सम्म सडक बाटोबाट पुग्न लगभग असंभव देखिएको छ । अहिलेसम्म सो स्थानमा प्रहरी पनि पुग्न नसकेको मकवानपुरको प्रहरी प्रमुख उपरिक्षक सिताराम रिजालले जानकारी दिए ।