सिमरा (हाम्रो खेलकुद) – रुस्लान आठौं सिमरा गोल्डकप फुटबल प्रतियोगिताको फाइनलमा शनिबार त्रिभुवन आर्मी क्लब र सिएमजी क्लब संकटाबीच प्रतिस्पर्धा हुँदैछ । सिमरा रंगशालामा हुने फाइनल रोमाञ्चक हुनेमा दुवै टोलीका प्रशिक्षक आशावादी छन् । आर्मी नवीन न्यौपाने र संकटा सल्याण खड्कीको प्रशिक्षणमा उत्रदैछ । यो सिजन संकटा र आर्मीबीच भेट हुन लागेको यो चौथो पटक हो । यसअघिका तीन मध्ये दुई खेल संकटा र एक खेल आर्मीले जितेको थियो ।

यो सिजनमा आर्मीले भाग लिएको यो दसौं प्रतियोगिता हो भने संकटाको आठौं प्रतियोगिता हो । सिजन पाँच वटा प्रतियोगिताको फाइलन खेलेको आर्मीले तीन उपाधि जितेको थियो । आर्मीले नेपाल कप, सुमन भोम्जन स्मृति कप र दुबही गोल्डकपको उपाधि उचालेको थियो ।

त्यस्तै संकटाले यसअघि नारायणघटमा विकास सिल्ड फुटबलको उपाधि जित्ने क्रममा आर्मीलाई हराएको थियो । माघ १ गते संकटाले सुदरुपश्चिमाञ्चल खप्तड गोल्डकप फुटब प्रतियोगिताको फाइनल खेलेको थियो । जारी रुस्लान सिमरा गोल्डकपमा आर्मीले हिमालयन शेर्पा र संकटाले साविक बिजेता बिजय युथ क्लबलाई २–१ ले हराउँदै एकअर्काको भेट पक्का गरेका थिए ।

नव जनजागृती क्लबले आयोजना गरेको प्रतियोगिताको विजेताले उपाधिसहित ५ लाख ५१ हजार रुपैयाँ प्राप्त गर्नेछ ।