काठमाडौं (हाम्रो खेलकुद) – एएफसी यु-२० एसियन कप छनोटमा नेपाल उज्वेकिस्तानसँग ६-० को फराकिलो अन्तरमा पराजित भएको छ । दोस्रो हारमा नेपालको छनोटको संभावना अत्यन्त न्युन बनेको छ ।

चाइनिज ताइपेइमा जारी छनोट अन्तर्गत आज न्यु ताइपेइस्थित फु जेन क्याथोलिक युनिभर्सिटीको मैदानमा भएको खेलमा नेपालको पोष्टमा उज्वेकिस्तानले सहजै आधा दर्जन गोल गर्यो ।

सुरूवात देखि नै आतिएको नेपालले २०औं मिनेटमा उज्वेकिस्तानलाई पेनाल्टीको अवसर दियो । युरिनबोएभको फ्रि-किक प्रहारलाई सविन घिमिरेले हातले रोके । रातो कार्ड खाँदै सविन बाहिरीएपछि युरिनबोएभको पेनाल्टी प्रहारलाई नेपालका गोलकिपर जियारत शेखले बचाए ।

यसपछि पनि निरन्तर दबाब दिन सफल उज्बेकिस्तानको लागि साइदुमारजोन साइद्नुरूलाएबले २४ औं मिनेटमा गोलको खाता खोले । यसको दुई मिनेटमा नै साइद्नुरूलाएबले अग्रता दुगुना गरे। उनले तीन मिनेटभित्र दुई गोल गरे । दुई गोल खाएर सम्हालिन नपाउँदै नेपालले २९औं मिनेटमा तेस्रो गोल खायो । नुर्लान इभराइमोभले गोल गरे । निरिह नेपाल विरूद्ध उज्वेकिस्तानले पहिलो हाफमा तीन शुन्यको स्पष्ट अग्रता बनायो ।

दोस्रो हाफमा पनि नेपाल सम्हालिन सकेन । उज्वेकिस्तानले थप तीन गोल गर्दै गोल सङ्ख्या आधा दर्जन पुर्याएको हो । ६७औं मिनेटमा लाजिबेक मिर्जाएब र ८७औं मिनेटमा मेरिबेक रेजाबालिएभले गोल गर्दा उज्वेकिस्तान ५-० ले अगाडि बढ्यो । उज्वेकिस्तानको लागि छेटौं गोल अब्दुगोफुर हायदारोभले गरे। यो सँगै नेपालले ६-० को लज्जास्पद हार बेहोरेको छ ।

उज्वेकिस्तानको यो लगातार दोस्रो जित हो र छनोटको संभावनालाई बलियो बनाएको छ । उसले दुई खेलबाट ६ अंक जोडेको छ । नेपालले तीन खेलबाट मात्र ३ अंक बनाएको छ । नेपाल पहिलो खेलमा क्याम्बोडियासँग ४-१ ले हार्दा दोस्रो खेलमा चाइनिज ताइपेइलाई ३-१ ले हराएको थियो। अब नेपाले समिह चरणको अन्तिम खेल शुक्रबार बहराइनसँग खेल्नेछ ।

ग्रुप बीमा नेपाल डिफेन्डिङ च्याम्पियन उज्बेकिस्तान, बहराइन, चाइनिज ताइपेइ र कम्बोडियासँग रहेको छ। सन २०२५ मा हुने एएफसी यु-२० एसियन कपमा कुल ४५ राष्ट्रको सहभागीता रहेको छ। ४५ राष्ट्रलाई दश समुहमा विभाजन गरिएको छ। प्रत्येक समुहको विजेता र ५ उत्कृष्ट उपविजेता यु-२० एसियन कपमा छनोट हुनेछन।