काठमाडौं(हाम्रो खेलकुद) – संकटा क्लबलाई हराउँदै बागमती युथ क्लबले एन्फा महिला लिगको दोस्रो चरण प्रवेशको सम्भावना बलियो बनाएको छ ।

आफ्नो आठौं खेलमा तेस्रो जित निकाल्नेक्रममा बागमतीले मंगलवार संकटामाथि ३-१ को जित हासिल गरेको हो ।

एन्फा कम्प्लेक्स सातदोबाटोमा भएको दिनको दोस्रो खेलमा बागमतीलाई जित दिलाउन गिफ्टी अचालिगंपोगले २ तथा पुष्पा कुमारी खड्काले १ गोल गरिन् । संकटाका लागि तोमिलोपे जेनिफरले सान्त्वना गोल गरिन् ।

गिफ्टीले ६७औं मिनेटमा गोल गर्दै बागमतीलाई अग्रता दिलाइन् । गिफ्टीले नै ७६औं मिनेटमा व्यक्तिगत दोस्रो गोल गर्दै अग्रता दोब्बरको बनाइन् ।

संकटाका लागि जेनिफरले ८३औं मिनेटमा गोल फर्काइन् । इन्ज्युरी समयमा बागमतीकी पुष्पाले गोल गरिन् ।

जितपछि बागमती ८ खेलमा १० अंकका साथ छैटौं स्थानमा उक्लिएको छ । यो जितले बागमतीको दोस्रो चरणमा पुग्ने सम्भावना कायमै रहेको छ ।

समान खेलबाट ८ अंकका साथ सातौं स्थानमा झरेको संकटाको भने अर्को चरण पुग्ने सम्भावना कमजोर बनेको छ ।

आजै भएको पहिलो खेलमा चन्द्रा भन्डारीको ह्याट्रिक सहयोगमा त्रिभुवन आर्मी क्लबले वालिङ नगरपालिकालाई पराजित गरेको छ । आर्मीले वालिङमाथि ८-० को जित हात पारेको हो ।

आर्मीको जितमा चन्द्रा प्लेयर अफ द म्याच भइन् । आर्मीका लागि चन्द्राका साथै विमला विक र अमिशा कार्कीले समान २ गोल गर्दा वालिङले १ गोल उपहार स्वरुप दियो ।

जितसँगै आर्मीको ८ खेलबाट १९ अंकका साथ दोस्रो स्थानमा छ । आर्मीले दोस्रो चरणमा स्थान पक्का गरेको छ ।

वालिङ समान खेलमा १२ अंकका साथ चौथो स्थानमा छ । हारपछि पनि वालिङको अर्को चरण प्रवेशको सम्भावना कायमै रहेको छ ।

अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागिता रहेको छ । सहभागी टोलीले पहिलो चरणमा एक अर्का विरुद्ध खेल्नेछन् । पहिलो चरणमा शीर्ष ५ मा रहने टोली दोस्रो चरणका लागि छनोट हुनेछ ।