गाईघाट (हाम्रो खेलकुद)– ए डिभिजन टोली हिमालयन शेर्पा क्लब रमपम चौथो उदयपुर गोल्डकप फुटबल प्रतियोगिताको सेमिफाइनलमा पुगेको छ । आयोजक उदयपुर जिल्ला फुटबल संघको उदयपुर ११ लाई ४–१ ले हराउँदै हिमालयन शेर्पा लगातार दोस्रो नकआउट प्रतियोगिताको अन्तिम चारमा पुगेको थियो ।

सिमरामा जारी रुस्लान सिमरा गोल्डकप फुटबल प्रतियोगितामा पनि हिमालयन सेमिफाइनलमा पुगेको थियो । अब उदयपुरमा हिमालयन शेर्पाले झापा ११ र रुपन्देही ११ बीचको विजेतासँग सेमिफाइनल खेल्नेछ । एकपक्षिय खेलमा हिमालयनले पहिलो हाफमै २–१ ले अग्रता लिएको थियो ।

सुरज हमालको गोलबाट ११ औं मिनेटमा हिमालयनले अग्रता लिएको थियो भने आयोजक टोलीका लागि २२ औं मिनेटमा रामु थापाले बराबरी गोल गरेका थिए । लक्ष्मी परियारको आत्मघाती गोलबाट हिमालयनले पहिलो हाफमै पुनः अग्रता बनाएको थियो । दोस्रो हाफमा अन्त्यतिर दुई गोल थप्दै हिमालयनले सहजै अन्तिम चारको यात्रा तय गरेको थियो । ८२ औं मिनेटमा हिमालयनका लागि माउसाले गोल गरे भने खेल सकिन ५ मिनेट बाँकी रहँदा विश्वास श्रेष्ठले गोल गरे । विश्वास खेलको म्यान अफ दी म्याच घोषित भए ।
प्रतियोगिताको उद्घाटन खेलमा बिहीबार खेलको अन्त्यतिर राज पौडेलले दुई गोल गरेपछि सिएमजी क्लब संकटाले धरान फुटबल क्लबलाई ३–१ ले हराउँदै सेमिफाइनल पुगेको थियो । प्रतियोगिताको विजेताले २ लाख रुपैयाँ प्राप्त गर्नेछ ।

रमपम उदयपुर गोल्डकपमा शनिबार
एपिएफविरुद्ध मोरङ ११