काठमाडौं(हाम्रो खेलकुद) – विभागीय टोली नेपाल पुलिस क्लबले एन्फा महिला लिगमा वालिङ नगरपालिकामाथि जित हात पारेको छ । वालिङलाई हराउँदै पुलिसले आफ्नो अपराजित यात्रा कायमै राखेको हो ।

त्रिपुरेश्वरस्थित दशरथ रंगशाला भएको खेलमा पुलिसले वालिङलाई २-० ले पराजित गरेको हो । पुलिसलाई जित दिलाउन दुवै गोल सम्झना लावतीले गरिन् । सम्झनाले ६७औं र इन्ज्युरी समयमा गोल गरिन् ।

पुलिस ७ खेलबाट १५ अंकका साथ तेस्रो स्थानमा कायमै रहेको छ ।  वालिङ समान ७ खेलमा समान १२ अंकका साथ चौथो स्थान छ ।

आजै भएको पहिलो खेलमा संकटा क्लबले सुदूरपश्चिम प्रदेशलाई पराजित गरेको थियो । टोमिलोपे जेनिफरले ४ गोल गरेको खेलमा संकटा क्लबले सुदूरपश्चिम प्रदेशलाई‌ ६-० ले हराएको छ ।

त्रिपुरेश्वरस्थित दशरथ रंगशालामा भएको खेलमा संकटाको जितमा जेनिफरका अलवा ममता पुन र पुर्णिमा हमालले समान १ गोल गरे । सातौं खेलमा संकटको यो दोस्रो जित हो।

खेलको चौथो मिनेटमा पहिलो गोल गरेकी जेनिफरले १२औं र ५२औं मिनेटमा गोल गर्दै ह्याट्रिक पूरा गरिन् । ममताले ८३औं मिनेटमा गोल गर्दै खेललाई ४-० मा पुर्याइन् । ८७औं मिनेटमा पुर्णीमाले गोल गरिन् । इन्ज्युरी समयमा जानिफरले व्यक्तिगत चौथो गोल गर्दै संकटाको‌ जित अन्तर फराकिलो पारिन् ।

संकटा ७ खेलमा ८ अंकका साथ तालिकाको छैटौं स्थानमा उक्लिएको छ । समान खेलमा अंक बिहीन सुदूरपश्चिम तालिकाको पुछारमा छ ।

अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागिता रहेको छ । सहभागी टोलीले पहिलो चरणमा एक अर्का विरुद्ध खेल्नेछन् ।