काठमाडौं (हाम्रो खेलकुद) – एन्फा महिला लिगमा वालिङ नगरपालिकाले बागमती युथ क्लबलाई पराजित गरेको छ ।

छैटौं खेलमा चौथो जित हात पार्ने क्रममा वालिङले बागमतीमाथि ४-० को जित हात पार्यो । एन्फा कम्प्लेक्स सातदोबाटोमा भएको खेलमा वालिङको जितमा ज्याकलिन नासालीले ह्याट्रिक तथा सिसी नान्टोंगोले १ गोल गरिन् ।

वालिङका लागि २२औं मिनेटमा नान्टोंगोले गोल गर्दै टोलीलाई अग्रता दिलाइन् । पेनाल्टी क्षेत्र बाहिरप्राप्त फ्रिकिकमा सिसीको प्रहार वालमा लागेर फर्केपछि रिबाउन्ड क्लियर हुन नसक्दा उनले गोल गरिन् । ४०औं मिनेटमा वालिङको अग्रता दोब्बर भयो । सिसीको प्रहार ज्याकलिनलाई लाग्दै गोल हुँदा वालिङ २-० ले अघि बढ्यो ।

नासालीले दोस्रो हाफको ५४औं र ८०औं मिनेटमा गोल गर्दै वालिङको जित पक्का गरिन् । जारी लिगमा उनको यो दोस्रो ह्याट्रिक हो । जित पछि ६ खेलमा १२ अंक जोड्दै वालिङ चौथो स्थानमा उक्लिएको छ । पराजित बागमतीको समान खेलबाट ४ अंक भएको छ ।

अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागीता छ । सहभागी १० टोलीले पहिलो चरणमा एक अर्का विरुद्ध खेल्नेछन् ।

*म्याच कमिस्नर रिपोर्टमा दोस्रो गोल ज्याकलिन नासालीको नाममा दिइएकोले सोहीअनुसार परिवर्तन गरिएको छ ।