काठमाडौं (हाम्रो खेलकुद) – एन्फा महिला लिगमा सुदूरपश्चिम प्रदेशले लगातार छैटौं हार बेहोरेको छ ।बुधवारको दोस्रो खेलमा सुदूर कर्णाली प्रदेशसॅंग ३-० गोल अन्तरले पराजित भयो ।

एन्फा कम्प्लेक्स सातदोबाटोमा भएको खेलमा कर्णालीलाई जित दिलाउन भुमिका बुढाथोकी, वर्षा ओली र गरिमा राईले गोल गरे ।

कर्णालीका लागि भुमिकाले २४औं मिनेटमा गोल गर्दै टिमलाई अग्रता दिलाइन् । गरिमाले ६२औं मिनेटमा अग्रता दोब्बर बनाइन् । त्यसको १ मिनेट पछि वर्षाले गोल गर्दै कर्णालीलाई जित दिलाइन् ।

कर्णाली लिगमा पहिलो जित निकाल्दै ६ खेलबाट ४ अंक जोडेको छ । सुदूरले भने समान खेल खेल्दै अंकको खाता खोल्न सकेको छैन ।

आजै भएको पहिलो खेलमा विभागीय टोली नेपाल पुलिस क्लबलाई चन्द्रपुर नगरपालिकाले गोलरहित बराबरीमा रोकेको थियो । लगातार दोस्रो बराबरीसँगै पुलिस ६ खेलबाट १२ अंकका साथ लिगको तेस्रो स्थानमा छ ।

पुलिसले चन्द्रपुरलाई हराउँदै दोस्रो स्थानमा उक्लिने मौका गुमाएको छ । दोस्रो स्थानमा रहेको आर्मी समान खेल खेलेर १३ अंकमा रहेको छ । चन्द्रपुर ६ खेलमा ७ अंकका साथ छैटौं स्थानमा छ ।

अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागीता रहेको छ । सहभागी १० टोलीले पहिलो चरणमा एक अर्का विरुद्ध खेल्नेछन् ।