काठमाडौं(हाम्रो खेलकुद) – एन्फा महिला लिगमा आइतवारको दोस्रो खेलमा बागमती युथ क्लब र चन्द्रपुर नगरपालीकाले अंक बाडेका छन् ।

एन्फा कम्प्लेक्स सातदोबाटोमा भएको खेलमा बागमती र चन्द्रपुरले गोलरहित बराबरी खेलेका हुन् । गोल गर्ने मौका पाए पनि दुवै टोलीले गोल भने गर्न सकेनन् ।

बराबरीसॅंगै चन्द्रपुरको ५ खेलमा ४ अंक भएको छ । उता बागमतीको समान खेलमा समान ४ अंक भएको छ ।

एपिएफ शीर्ष स्थानमा उक्लियो

विभागीय टोली नेपाल एपिएफ क्लब कर्णाली प्रदेशलाई पराजित गर्दै शीर्ष स्थानमा उक्लिएको छ । आफ्नो अपराजित यात्रा कायम राख्ने क्रममा एपिएफले कर्णालीलाई ६-० ले पराजित गर्यो ।

एन्फा कम्प्लेक्स सातदोबाटोमा भएको आईतवारको पहिलो खेलमा एपिएफला जित दिलाउन रश्मिकुमारी घिसिङले २ तथा हिमा रावत, निशा थोकर र गीता रानाले समान १ गोल गर्दा १ गोल कर्णालीले आत्मघाती गर्यो ।

एपिएफका लागि चौथो मिनेटमा निशाले गोल गर्दै एपिएफलाई अग्रता दिलाइन् । ११औं मिनेटमा रश्मिको गोलमा एपिएफले अग्रता दोब्बरको बनायो । २५औं मिनेटमा रश्मिले व्यक्तिगत दोस्रो गोल गरिन् ।

गीताले ५३औं मिनेटमा पेनाल्टी मार्फत गोल गर्दा ७७औं मिनेटमा हिमाले गोल गरिन् । अन्तिम मिनेटमा कर्णालीकी बर्षा ओलीले आत्मघाती गोल गर्दा एपिएफको जित अन्तर फराकिलो भयो।

एपिएफ ५ खेलमा १३ अंक जोड्दै शीर्ष स्थानमा उक्लिएको छ । दोस्रो स्थानको पुलिसको समान खेलबाट ११ अंक रहेको छ ।

अखिल नेपाल फुटबल संघ (एन्फा) को आयोजना जारी लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।