काठमाडौं(हाम्रो खेलकुद) – एन्फा महिला लिगमा बुधवार दुई खेल हुँदैछन् । लिगमा आजबाट चौथो राउन्डका खेलहरु सुरु हुदैछ ।

एन्फा कम्प्लेक्स सातदोबाटोमा हुने पहिलो खेलमा कोशी प्रदेश र विभागीय टोली नेपाल पुलिसबीच प्रतिस्पर्धा हुनेछ । खेल मध्यान्ह १२ः३० बजे सुरु हुनेछ ।

कोशी तीन खेलमा शतप्रतिशत जितका साथ अंक तालिकाको शीर्ष स्थानमा रहेको छ । पुलिसलाई हराउँदै कोशी चौथो खेलमा पनि अपराजित यात्रा कायम राख्न चाहन्छ ।

पुलिस भने ३ खेल मध्ये २ जित र १ बराबरीसहित ७
अंक लिएर तालिकाको दोस्रो स्थानमा छ । कोशीलाई हराउँदै पुलिस लिगको पहिलो स्थानमा उक्लिन चाहन्छ । यस खेलमा विजेता हुने टोली शीर्ष स्थानमा रहने हुँदा खेल प्रतिस्पर्धात्मक हुने अनुमान रहेको छ ।

आज नै हुने दोस्रो खेलमा कर्णाली प्रदेश र संकटा क्लबबीच प्रतिस्पर्धा हुनेछ । एन्फा कम्प्लेक्समा हुने खेल दिउँसो ३ः३० मा सुरु हुनेछ ।

संकटा र कर्णाली ३ खेलमा १ बराबरी २ हारका साथ अंक तालिकाको आठौं र नवौं स्थानमा छन् । दुवै टोली पहिलो जितको लक्ष्यका उत्रनेछन्।

अखिल नेपाल फुटबल संघ (एन्फा) को आयोजना सुरु भएको लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।