एजेन्सी – युइएफए नेसन्स लिगको पहिलो चरणमा इङ्ग्ल्यान्डले लगातार दोस्रो जित हात पारेको छ ।

इङ्ग्ल्यान्डले मंगलवार फिनल्यान्डमाथि २-० को जित हात पार्यो । घरेलु मैदानमा भएको खेलमा इङ्ग्ल्यान्डलाई जित दिलाउन दुवै गोल ह्यारी केनले गरे । इङ्ग्ल्यान्डबाट केनको‌ त्यो एक सयौं खेल थियो।

केन इङ्ग्ल्यान्डको लागि आफ्नो सयौं खेलमा २ गोल गर्ने पहिलो खेलाडी बनेका छन् । त्यस्तै उनी सयौं खेलमा इङ्ग्ल्याण्डका लागि गोल गर्ने तेस्रो खेलाडी बने । यसअघि वायने रुनीले सन्‌ २०१४ र बबी चार्लटनले १९७० मा आफ्नो सयौं खेलमा इङ्ग्ल्याण्डका लागि गोल गरेका थिए।

केनले दुवै गोल दोस्रो हाफ गरेका थिए। केनले ५७औं मिनेटमा पहिलो गोल गर्दै घरेलु टोलीलाई अग्रता दिलाए ।

केनले ७६औं मिनेटमा अर्को गोल गर्दै इङ्ग्ल्यान्डलाई जित दिलाए । त्यो उनको इङ्ग्ल्याण्डका लागि ६८ औं गोल हो। पहिलो खेलमा इङ्ल्यान्डले आयरल्यान्डलाई २-० ले पराजित गरेको थियो ।

२ खेलमा ६ अंक जोडेको इङ्ग्ल्यान्ड आफ्नो समूह १ को दोस्रो स्थानमा छ । समान अंकको ग्रिस गोल अन्तरमा शीर्ष स्थानमा छ । अन्य खेलमा ग्रिस, जर्जिया, नर्थ म्याक्यान्डाेनिस, माल्टा विजयी भएका छन् ।