चन्द्रपुरविरुद्ध एपिएफको गोल वर्षा

काठमाडौं(हाम्रो खेलकुद) – विभागीय टोली नेपाल एपिएफ क्लबले चन्द्रपुर नगरपालिकामाथि फराकिलो जित निकालेको छ । तेस्रो खेलमा दोस्रो जित निकाल्ने क्रममा एपिएफले चन्द्रपुरलाई ६-० ले पराजित गरेको हो ।

एन्फा कम्प्लेक्स सातदोबाटोमा सोमवार भएको खेलमा एपिएफलाई जित दिलाउन रेनुका नगरकोटेले २ तथा रश्मी कुमारी घिसिङ, प्रिती राई, गिता राना र सविता राना मगरले समान १ गोल गरिन् ।

एपिएफले १८औं मिनेटमा सविताको गोलबाट अग्रता लिएको थियो । एपिएफका लागि ३२औं र ३५औं मिनेटमा रेनुकाले गोल गरिन् । पहिलो हाफमा ३ गोलले अघि रहेको एपिएफले दोस्रो हाफमा ३ गोल थपेको थियो ।

एपिएफका लागि ५२औं मिनेटमा रश्मी र ८४औं मिनेटमा प्रितीले गोल गरे । निर्धारित समय सकिन २ मिनेट बाकी रहॅंदा गिताले पेनाल्टी गरिन् ।

जितसॅंगै एपिएफ ३ खेलमा ७ अंकका साथ तेस्रो स्थानमा छ । पराजित चन्द्रपुर समान खेलबाट २ अंक जोडेर सातौं स्थानमा छ । आजै भएको पहिलो खेलमा संकटा क्लबमाथि वालिङ नगरपालीकाले १-० को जित निकालेको थियो ।

अखिल नेपाल फुटबल संघ (एन्फा) को आयोजना सुरु भएको लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।