सुशील पन्त क्षेत्री, चितवन

गोल्डेन इमिनेन्ट दोस्रो चितवन गोल्डकप असोज पहिलो साता सुरु हुने भएको छ ।

आयोजक भरतपुर फुटबल क्लब (बिएफसी) ले आइतवार पत्रकार सम्मेलनमार्फत प्रतियोगिता बारे जानकारी दिएको हो ।

नेपाल प्रहरी शिक्षालय भरतपुर तालिमकेन्द्रको मैदानमा हुने प्रतियोगिता असोज ३ देखि १२ गतेसम्म चल्नेछ । प्रतियोगितामा ए डिभिजन, नेपाल सुपर लिग र मोफसल क्लब गरी १० टोली सहभागी हुनेछन् ।

प्रतियोगितामा आयोजक बिएफसी, सूर्यपुर एफसी, नेपाल पुलिस क्लब , बुटवल लुम्बिनी एफसी, बागमती युवा क्लब सर्लाही, वीरगञ्ज युनाईटेड, सल्हेस एफसी सिराहा, न्यु स्टार सुनसरी र राइजिङ स्टार भुमहीले‌ प्रतिस्पर्धा गर्ने बताइएको छ।

अर्को एउटा टोलीको केही दिनमा टुंगो लाग्ने ध्रुव भुसालले जानकारी दिए । प्रतियोगिताको उद्घाटन खेल सूर्यपुर एफसी र बागमती युवा क्लब भिड्नेछन् । उद्घाटन खेल दिउँसो ३ बजे हुनेछ ।

प्रतियोगिताको विजेताले ट्रफीसहित ६ लाख र दोस्रो हुने टोलीले ३ लाख रुपैयाँ प्राप्त गर्नेछ । प्रतियोगिताकल सर्वोत्कृष्ट खेलाडीले १५, विधागत उत्कृष्टले १० तथा म्यान अफ दि म्याचले ५ हजार रुपैयाँ प्राप्त गर्नेछन् ।

करिब ४० हजार दर्शकले प्रत्यक्ष रुपमा प्रतियोगिताको खेलहरु अवलोकन गर्ने आयोजकको अनुमान छ । दर्शकका लागि पहिलो चरणमा ५०, क्वाटरफाइनल र सेमिफाइनलमा १ सय तथा फाइनलमा २ सय रुपैयाँको टिकट दर तोकिएको संयोजक भुसालले जानकारी दिए ।

प्रतियोगिताको मुख्य प्रायोजकमा गोल्डेन इमिनेन्ट इन्टरनेशनल तथा सह प्रायोजकमा हानामी इन्टरनेशनल एजुकेसन रहेका छन् ।

बागमती प्रदेश सरकार, भरतपुर महानगरपालिका र चितवन जिल्ला फुटबल संघ प्रतियोगिताको प्रवर्द्धक संस्था हुन् ।