एजेन्सी – जर्मनीले युइएफए नेसन्स लिगमा फराकिलो जित निकालेको छ । ग्रुप थ्रीमा जर्मनीले शनिवार हङ्गेरीमाथि ५-० को जित निकाल्यो ।

घरेलु मैदानमा भएको खेलमा जर्मनीको जितमा निकोलस फ्युलक्रुग, मुसियाला, फ्लोरियन विर्ट्ज, अलेक्जेन्डर पावलोभिच र काई हाभर्ट्ज गोल गरे ।

जर्मनीका निकोलस फ्युलक्रुगले २७औं मिनेटमा गोल गर्दै टोलीलाई अग्रता दिलाएका थिए। ५८औं मिनेटमा मुसियालाले गोल गर्दै अग्रता दोब्बर बनाए।

विर्ट्जले ६६औं मिनेटमा र ७७ औं मिनेटमा पावलोभिचले गोल गर्दै जर्मनीलाई ४-० को अवस्थामा पुर्‍याए । ८१औं मिनेटमा काई हाभर्ट्जले पेनाल्टीमार्फत गोल थपे।

अर्को खेलमा इङ्ग्ल्यान्डले युइएफए नेसन्स लिगको गणतान्त्रिक आयरल्यान्डलाई हराएको छ।
ग्रुप टुमा शनिवार भएको खेलमा इङ्ग्ल्यान्ड २-० ले विजयी भएको हो। टोलीलाई जित दिलाउन डेक्लेन राइस र ज्याक ग्रेलिसले गोल‌ गरे। राइसले ११ औं र ग्रेलिसले २६ औं मिनेटमा गोल गरेका हुन्।

कार्यवहाक प्रशिक्षक लि कार्ल्सलीको नेतृत्वमा इङ्ग्ल्यान्डले सफलता प्राप्त गरेको हो। गेराथ साउथगेटले छोडयता इङ्ग्ल्यान्डको यो पहिलो खेल‌ हो ।
युरो-२०२४ को समाप्तिमा साउथगेट प्रशिक्षकको जिम्मेवारीबाट अलग भएका थिए।

शनिवारका अन्य खेलमा नेदरल्यान्ड्स, अल्बानिया र ग्रिस विजयी भएका छन्। ग्रुप थ्रीमा नेदरल्यान्ड्सले बोस्निया एन्ड हर्जगोभिनालाई ५-२ ले पराजित गर्यो । ग्रुप वानमा अल्बानियाले युक्रेनलाई २-१ र ग्रुप टुमा ग्रिसले फिनल्यान्डलाई ३-० ले पराजित गरेको छ।