काठमाडौं(हाम्रो खेलकुद) – साविक विजेता एपिएफले एन्फा महिला लिग २०२४ मा पहिलो जित दर्ता गरेको छ ।

एन्फा कम्प्लेक्स सातदोबाटोमा शनिवार भएको खेलमा एपिएफले आर्मीलाई २-१ को गोल अन्तरले पराजित गर्यो । एपिएफको जितमा सविता राना मगर र गीता रानाले गोल गरिन् । आर्मीका लागि विमला चौधरीको गोल सान्त्वना बन्यो ।

खेलको सुरुवातमा आर्मीले खेलमा‌ दबाब बनाएपनि गोलको खाता भने एपिएफले खोलेको‌ थियो। पहिलो हाफको इन्ज्युरी समयमा सविताले गोल गर्दै एपिएफलाई अघि बढाइन्‌ ।

विमलाले ५६औं मिनेटमा बराबरी गोल फर्काइन् । ६७औं मिनेटमा गीताले पेनाल्टीमार्फत गरेको गोल खेलको निर्णायक बन्यो । वान भर्सेस वानमा आर्मीकी गोलकिपर अन्जना राना मगरले पेनाल्टी बक्समा अनिता केसीलाई लडाएपछि एपिएफले पेनाल्टी पाएको थियो।

आर्मीका सहायक प्रशिक्षक टेकबहादुर बुढाथोकीले पहिलो हाफमा पाएको मौका गुमाउँदा खेल गुमाउनु परेको बताए ।एपिएफका प्रशिक्षक जिवेश पाण्डेले विस्तारै टोली सेट हुँदै गएको बताए ‌।

दोस्रो खेलमा पहिलो जितपछि एपिएफ ४ अंकसहित दोश्रो स्थानमा छ। पहिलो खेलमा एपिएफ अर्को विभागीय टोली नेपाल पुलिस क्लबसँग गोलरहित बराबरीमा रोकिएको थियो ।

आर्मीले दोस्रो खेलमा पहिलो हार बेहोरेको छ । पहिलो खेलमा आर्मीले संकटा क्लबलाई पराजित गरेको थियो । ६ अंका साथ कोशी‌ प्रदेश अंक तालिकाको शीर्ष स्थानमा छ।

यो खेलसॅंगै प्रतियोगिताको दोस्रो राउन्डको समाप्ती भएको छ । दोस्रो राउन्डका खेलमा एपिएफ, पुलिस , वालिङ नगरपालिका र कोशी विजयी भए ।

पुलिसले सुदुरपश्चिमलाई, वालिङले कर्णाली प्रदेशलाई तथा कोशीले बागमती युथ क्लबलाई पराजित गरेको थियो । संकटा क्लब र चन्द्रपुर नगरपालिका बराबरी खेलेका‌ थिए।

अखिल नेपाल फुटबल संघ (एन्फा) को आयोजना जारी लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।