रेखाको गोलसँगै अबुधाबी समूह चरणमा

काठमाडौं (हाम्रो खेलकुद) – नेपाली राष्ट्रिय फुटबल टोलीकी फरवार्ड रेखा पौडेलको गोलमा अबुधाबी कन्ट्री क्लबले एएफसी महिला च्याम्पियन्स लिगको खेलमा अल नासरलाई पराजित गरेको छ ।

प्रारम्भिक चरणको समूह ए को अन्तिम खेलमा अल नासरलाई १-० ले पराजित गर्दै अबुधाबीले समूह चरणमा स्थान पक्का गरेको हो । खेलको ६८ औं मिनेटमा रेखाले गोल गर्दै टोलीलाई अग्रता दिलाएकी थिइन् । प्रारम्भिक चरणमा उनको यो दोस्रो गोल हो ।

यस जितसँगै अबुधाबीले ३ खेलमा ९ अंक जोड्दै शीर्षस्थान हासिल गर्यो । अल नासरको ६ अंक, योंग इलेफेन्टको ३ तथा म्यानमारको म्यवाडीले कुनै अंक जोडेन । रेखाले यसअघि इलेफेन्टमाथि २-१ को जितमा पनि गोल गरेकी थिइन् । उनी प्रतियोगितामा गोल गर्ने पहिलो खेलाडी समेत हुन् ।

अबु धाबीले अब च्याम्पियन्स लिगको समूह ए मा खेल्नेछ । यस समूहमा चीनको वुहान जियान्ग्दा, दक्षिण कोरियाको इन्चोन रेड एन्जल्स र मलेसियाको सबाह एफसी छन् । सबाह नेपालको एपीएफ सम्मिलित समूहको विजेता बन्दै अघि बढेको हो ।