दशरथ रंगशालामा कृत्रिम घाँस राख्ने प्रस्ताव!

काठमाडौं (हाम्रो खेलकुद) – अखिल नेपाल फुटबल संघ (एन्फा) को जारी कार्यसमिति बैठकले त्रिपुरेश्वरस्थित दशरथ रंगशालामा घाँसे मैदान हटाएर कृत्रिम घाँस राख्न प्रस्ताव गर्ने भएको छ ।

पछिल्लो समय मैदानको कमजोर अवस्थाका कारण एन्फाले यसपटक फिफाको सहयोगमा ३ लाख अमेरिकी डलर खर्च गरेर दशरथ रंगशालामा कृत्रिम घाँस अर्थात आर्टिफिसियल टर्फ राख्ने तयारी गरेको हो । हाल राष्ट्रिय खेलकुद परिषद (राखेप) को स्वामित्वमा रहेको रंगशालामा घाँस परिवर्तन गर्न एन्फाले अब प्रस्ताव लग्नेछ । राखेपले सहमति जनाएको खण्डमा एन्फाले फिफाको सहयोगमार्फत टर्फ राख्ने निर्णय गरेको हो ।

त्यस्तै सातदोबाटोस्थित एन्फा कम्प्लेक्सको मैदानमा रहेको टर्फ पनि परिवर्तन गरिने भएको छ । एन्फाको मैदानमा नयाँ टर्फ राखेर त्यहाँ रहेको पुरानो टर्फ भने लगनखेलस्थित बुद्धिविकास खेल मैदानमा सारिने भएको छ । त्यस्तै एन्फाले गोदावरीस्थित प्रस्तावित अन्तर्राष्ट्रिय फुटबल मैदान, कैलाली, सर्लाही लगायत अन्य स्थानमा पनि कृत्रिम घाँसे मैदान निर्माणका लागि बजेट छुट्याउने निर्णय गरेको छ ।

यो पनि : महासचिव राईको तलब २ हजार डलर पुर्याउन अध्यक्षको प्रस्ताव!