काठमाडौं (हाम्रो खेलकुद) – साफ यू२० च्याम्पियनसिपको उपाधिका लागि आयोजक नेपालले मंगलबार एन्फा कम्प्लेक्समा हुने फाइनलमा बंगलादेशको सामना गर्दैछ ।

यस उमेर समूहमा नेपाल उपाधिमा ह्याट्रिक गर्ने कोशिशमा रहनेछ भने बंगलादेश पहिलो उपाधि जित्ने सुरमा हुनेछ । जसको लागि नेपाल उत्कृष्ट लयमा पनि देखिएको छ । नेपाल अपराजित रहदै फाइनलमा‌ पुगेको हो । नेपालले यसअघि सन् २०१५ मा नेपालमै भएको पहिलो र भुटानमा सन् २०१७ मा भएको दोस्रो संस्करण जितेको थियो ।

फाइनलको अघिल्लो दिन नेपालका कप्तान कुशल देउवाले टिम उपाधि जित्न तयार रहेको बताए । तयारी राम्रो रहेको पनि उनले प्री म्याच कन्फरेन्समा जानकारी गराए । फरवार्ड लाइनमा तालमेल मिल्न सकेको छैन भन्ने प्रश्नमा अन्य टिमले नेपाली टिमको विषयमा पनि अध्ययन‌ गरेकोले केहि अप्ठयारो भएको पनि बताए । तर उनले आफ्नो‌ टिम र प्रत्येक खेलाडीमा पूर्ण विश्वास रहेको पनि स्पष्ट पारे ।

नेपाल साफ च्याम्पियनसिपको तेस्रो पटक फाइनलमा पुगेको हो । यसअघि दुवै पटक फाइनलमा पुग्दा नेपालले उपाधि जितेको थियो । यो पटक नेपाली टिम लयमा देखिएको छ । समुह चरणको दुई खेलमा श्रीलंकालाई १-० ले र बंगलादेशलाई २-१ ले हराएको थियो । सेमिफाइनलमा भुटानलाई टाइब्रकेरमा हराएर नेपाली टिम फाइनल पुगेको हो ।

नेपालले जारी च्याम्पियनसिपको समुह चरणमा बंगलादेशलाई २-१ ले हराइसकेको छ । यसले पनि नेपाललाई केहि सहज हुन सक्छ । सबैभन्दा ठुलो फाइदा भने खेल हुने एन्फाको एस्ट्रो टर्फ मैदान नै हुनेछ । नेपालले यही मैदानमा प्रशिक्षण गरेको हो ।

फाइनल दशरथ रङ्गशालामा हुने भनिएपनि हिजो एन्फाले मैदानको अवस्थाका कारण सातदोबाटोमा नै फाइनल हुने निर्णय गरेको थियो । मैदानको फाइदा रहने भएपनि दर्शकको साथको कमी महसुस हुने प्रशिक्षक उर्जन श्रेष्ठले बताए । उनले टिमले पूर्ण क्षमता अनुसार खेल्न नसकेको पनि जिकिर गरे । उनले क्षमता अनुसार योजना अनुरूप खेलेमा जित निकाल्न सक्ने बताए ।

बंगलादेश भने समुह उपविजेता बन्दै सेमिफाइनलमा पुगेको हो । तर सेमिफाइनलमा तीन पटकको विजेता तथा डिफेन्डिङ च्याम्पियन भारतलाई टाइब्रेकरमा हराएर फाइनलको यात्रा तय गरेको हो । भारतलाई हराएर फाइनल पुगेको टिममा थप आत्मविश्वासी बनेको छ ।

प्रशिक्षक मारूफुलहलले भारतलाई हराएको पुरानो कुरा भएको र नेपालसँगको फाइनल खेल नयाँ खेल हुने र यो चुनौतीपुर्ण रहने बताए । उनले नेपालको बारेमा जानकारी रहेको र सोही अनुरुप खेल्ने बताए । बङ्गलादेशका कप्तान मोहमद असिफले नेपाली टिम उत्कृष्ट रहेको तथा नेपालको गतिसँग जानकार रहेको बताए । साथै उनले नेपाली टिममा क्वालिटीका खेलाडी रहेको र त्यसको अययन टिमले गरेको बताए ।

तर बंगलादेश कप्तान तथा पहिलो रोजाइका गोलकिपर मेहदी हसन घाइते भएका छन् । उनको तत्काल शल्यक्रिया गर्नुपर्ने भएकोले फाइनल खेल गुमाउनेछन् । यसले टिमलाई केहि असर गर्न सक्छ । तर वैकल्पिक गोलकिपर मोहम्मद आशीफले भारत विरूद्ध टाइब्रेकरमा सानदार प्रदर्शन गरेका थिए । उनले भारतको दुई पेनाल्टी प्रहार रोकेका थिए। अब फाइनलमा गो पोष्ट सम्हाल्ने जिम्मेवारी उनलाई नै रहेको छ ।

बंगलादेश साफ‌ च्याम्पियनसिपको तीन पटकको उपविजेता हो । सन् २०१७ मा राउन्ड रोबिनको आधारमा भएको च्याम्पियनसिपमा नेपाल र बंगलादेशको समान ९/९ अंक भएपनि हेड टु हेडको आधारमा नेपाल च्याम्पियन बनेको थियो । सन् २०१९ र सन २०२२ मा भने बंगलादेश फाइनलमा भारतसँग हारेको थियो।

छेटौं संस्करण सम्म आइपुग्दा नेपाल र बंगलादेशबीच चार पटक प्रतिस्पर्धा भएको छ ।‌ जहाँ नेपालले तीन खेल जित्दा एक खेलमा बराबरी नतिजा निकालेको थियो । यो अर्थ बंगलादेश विरूद्ध नेपाल अपराजित छ । साथै तीन संस्करणपछि फाइनलमा‌ पुगेको कारण उपाधि जित्ने सुनौलो अबसर नेपाली युवा टिमलाई रहेको छ ।

यो छैटौं संस्करणको च्याम्पियनसिप हो । साफले उमेर समुह भने विभिन्न संस्करणमा परिवर्तन गर्ने गरेको छ । नेपालले सन २०१५ र २०१७ को पहिलो र दोस्रो संस्करणको उपाधि जितेको थियो । बंगलादेश भने पहिलो पटक उपाधि जित्ने दाउमा रहनेछ। फाइनल खेल बुधबार २:३० बजे एन्फा कम्प्लेक्समा हुनेछ ।