महासचिव राईको तलब २ हजार डलर पुर्याउन अध्यक्षको प्रस्ताव!

काठमाडौं (हाम्रो खेलकुद) – अखिल नेपाल फुटबल संघ (एन्फा) का महासचिव किरण राईको तलब २ हजार अमेरिकी डलर पुर्याउन एन्फा कार्यसमिति बैठकमा अध्यक्ष पंकज नेम्वाङले प्रस्ताव राखेका छन् ।

सातदोबाटोस्थित एन्फा कम्प्लेक्समा जारी बैठकमा अध्यक्ष नेम्वाङले महासचिवको तलब वृद्धि गर्न प्रस्ताव गरेका हुन् । हाल महासचिव किरण राईले १ लाख २० हजार मासिक बुझ्दै आएका छन् । अध्यक्ष नेम्वाङले एजेन्डा नम्बर ८ मा कर्मचारीको सेवा सुविधाबारे छलफलमा महसचिवको तलब २ हजार अमेरिकी डलर अर्थात् झन्डै २ लाख ७० हजार रुपैयाँ पुर्याउने प्रस्ताव राखेका हुन् ।

यद्यपि बैठकमा उपस्थित सदस्यले भने यसमा आपत्ति जनाएका छन् । तर बैठकमा संस्थापन पक्षको बहुमत रहेकाले यो प्रस्ताव पारित हुने देखिन्छ ।

बैठकले राष्ट्रिय खेलाडीको तलब १८ हजार रुपैयाँ बाट मासिक ३० हजार रुपैयाँमा वृद्धि गरेको छ । यो निर्णय भने सर्वसम्मतले पारित भएको हो । यसपटक तलब वृद्धि गर्दा भने खेलाडीको वर्गीकरण गरेर त्यस अनुसार तलब प्रदान गरिनेछ ।

बैठक विहान १०:४५ बजे सुरु भएको थियो । हाल आठौं एजेन्डामा छलफल भइरहेको छ ।