हालान्डको ह्याट्रिकमा सिटी विजयी

एजेन्सी – नर्वेली फरवार्ड एर्लीङ हालान्डको ह्याट्रिकको मद्दतमा गत सिजनको विजेता म्यानचेस्टर सिटीले इंग्लिस प्रिमियर लिगमा लगातार दोस्रो जित दर्ता गरेको छ ।

घरेलु मैदान इतिहात स्टेडियममा सिटीले इप्सविच टाउन फुटबल क्लबमाथि ४-१ को सहज जित दर्ता गरेको हो । सिटीको जितमा हालान्डले ह्याट्रिक तथा केभिन डि ब्रुएनले १ गोल गरे । इप्सविचका लागि स्यामी स्माडिकले सुरुवाती अग्रता दिलाएका थिए ।

स्माडिकले सातौं मिनेटमा गोल गर्दै खाता खोलेका थिए । सिटीका लागि १२औं मिनेटमा हालान्डले पेनाल्टिमार्फत गोल गर्दै खेल बराबरीमा ल्याए । १४औं मिनेटमा डे ब्रुएनले गोलरक्षकको गल्तीमा गोल गर्दै सिटीको अग्रता दोब्बर बनाए ।

दुई मिनेट पछि हालान्डले उत्कृष्ट फिनिसमा व्यक्तिगत दोस्रो गोल गरे । निर्धारित समय सकिनु २ मिनेट अघि हालान्डले आफ्नो ह्याट्रिक पूरा गर्दै सिटीको जित पक्का गरे ।

लगातार दोस्रो जितसँगै सिटीले ६ अंक जोडेको छ । सिटी अंक तालिकाको पहिलो स्थानमा छ । पहिलो खेलमा सिटीले चेल्सीलाई पराजित गरेको थियो ।