एजेन्सी – साउदी सुपर कपको उपाधि भिडन्तमा अल हिलालले अल नासरलाई पराजित गरेपछि पोर्चुगिज स्टार क्रिस्टियानो रोनाल्डो पुन: एकपटक साउदी अरबमा उपाधि जित्नबाट बन्चित भएका छन् ।

शनिबार भएको खेलमा रोनाल्डोकै गोलमा अल नासरले अग्रता लिएपनि खेल जित्न भने सकेन । पहिलो हाफमा १-० ले अघि रहेको अल नासरले ४-१ को अन्तरमा खेल हार्न पुग्यो । सिजनको पहिलो उपाधि जित्ने अवसर गुमाएका रोनाल्डो २ वर्षे बसाईंमा उपाधि विहिन छन् ।

पांच पटकका ब्यालोन डी’ओर विजेता रोनाल्डोले पहिलो हाफको अन्तिम मिनेटमा अल नासरलाई अग्रता दिलाएका थिए । तर दोस्रो हाफको मध्यतिर १७ मिनेटको अन्तरमा अल हिलालले ४ गोल फर्काएको थियो ।

सर्गे मिलिन्कोभिच साभिचले ५५ औं मिनेटमा बराबरी गोल फर्काए । पहिलो गोल सिर्जना गरेका एलेक्जेन्डर मित्रोभिचले त्यसको ८ मिनेटपछि रुबेन नेभेसको क्रसमा हेडरमार्फत गोल गरे ।

मित्रोभिचले ६९ औं मिनेटमा माल्कमको पासमा गोल गर्दै अग्रता बढाए । ७२ औं मिनेटमा माल्कमले अल नासरको डिफेन्समा भएको गल्तीको फाइदा उठाउँदै गोल थपे ।

अल हिलालाले लगातार दोस्रो पटक सुपर कप उपाधि जितेको हो । समग्रमा टोलीको यो पाँचौ सुपर कप उपाधि हो । गत सिजन अल हिलालले साउदी किंग्स कप र साउदी प्रो लिगमा अल नासरलाई पछि पारेको थियो ।