सुबास हुमागाईं, काठमाडौं

भारतीय क्लब किकस्टार्ट फुटबल क्लबले स्थानीय क्लब र संस्थासँग मिलेर इंग्लिस प्रिमियर लिगको क्लब टोटेनहम हट्सपर सम्म पुर्याउने भन्दै नेपालमा आयोजना गरेको ‘रोड टु टोटेनहम’ कार्यक्रम अवैध भएको पाइएको छ ।

किकस्टार्टले नेपालको बी डिभिजन क्लब श्री भगवती क्लब टोखा र भकुन्डो एनपी नामक संस्थासँग मिलेर ‘रोड टु टोटेनहम’ नामक कार्यक्रम दुई महिनाअघि आयोजना गरेको थियो । जसका लागि क्लबले झन्डै ३ हजार संख्यामा खेलाडीको ट्रायल लिएको थियो ।

टोखाले आफ्नो सामाजिक संजालमार्फत ‘किक्कस्टार्ट- टोटनह्याम एकेडेमीले यु-११ देखी यु-२१ सम्मका ट्यालेन्टेड नेपाली खेलाडीहरुका लागि ओपन ट्राइल यही बैशाख २९, ३० गते ललितपुरको च्यासलमा आयोजना गर्दै छ । ट्राइलबाट सेलेक्टेड ट्यालेन्टेड खेलाडीलाई युरोपियन क्लब टोटन्ह्यामको किस्कस्टर्ट-टोटन्ह्याम एकेडेमीले फुल इलाइट स्कलरशिप दिने छ भने उत्कृष्ट खेलाडीहरुका टोटन्ह्याम सम्म लागि रोड म्याप पनि दिने छ ।’ भनेर उल्लेख पनि गरेको छ ।

तर प्रिमियर लिग क्लब टोटेनहमलाई हाम्रो खेलकुदले यसबारे प्रश्न गर्दा किकस्टार्ट सँग यस्तो किसिमको कुनै सहकार्य नभएको क्लबले जनाएको छ । टोटेनहमले किकस्टार्टसँग नेपालको लागि त अझ कुनै प्रकारको सम्झौता नै नभएको समेत बताएको छ ।

हाल टोटेनहम र किकस्टार्टबीच प्राविधिक विकासका लागि प्रशिक्षण उपलब्ध गराउने सहमती मात्र भएको र पहिलो वर्षका लागि प्रशिक्षकको भिसामा काम भइरहेको इमेलमार्फत जानकारी दियो । टोटेनहमले नेपालमा भएको ‘यस ‘रोड टु टोटेनहम’ कार्यक्रमबारे क्लबलाई कुनै जानकारी नरहेको पनि प्रष्ट पारेको छ ।

यसबारे श्री भगवती क्लब टोखाका अध्यक्ष गणेशलाल श्रेष्ठलाई सोध्दा क्लबको कार्यसमिति परिवर्तन भएको र यसबारे आफूभन्दा अघिल्लो समितिले प्रष्ट पार्न सक्ने बताए । श्रेष्ठको नेतृत्वमा अघिल्लो साता मात्र सर्वसम्मतले नयाँ कार्यसमिति निर्वाचित भएको थियो ।

कार्यक्रम संयोजक रहेका मनिष जोशीले भने किकस्टार्टले नेपालमा आयोजना गर्ने इच्छा देखाएपछि क्लबले त्यसमा समन्वय गरेको बताए । ‘हामीले क्लबको विश्वास गरेर कार्यक्रम ल्यायौं । नेपालमा भएका प्रतिभालाई ठाउँ दिने सोचले नै यो आयोजना गरेका हौं । अब वहाँहरुले सहकार्य रहेको बताएपछि त्यसै अनुसार नेपालमा पनि ट्रायल गरेर खेलाडी प्रशिक्षणमा पठाएका छौं,’ एन्फा केन्द्रिय सदस्य समेत रहेका जोशीले भने ।

पहिलो चरणमा गएका केही खेलाडी यसै फर्किए

‘रोड टु टोटेनहम’ अन्तर्गत क्लबले छनोट गरेका खेलाडीमध्य केही भारत पुगेर यसै फर्केका छन् । नेपालको लागि उमेर समूह तथा सिनियर राष्ट्रिय टोलीको बन्द प्रशिक्षणसम्म नै पुगेका खेलाडी भारत पुगेर यसै फर्किनुपरेको छ । क्लबले नेपालका खेलाडीलाई टोटेनहम लग्ने प्रक्रिया जटिल हुने कारण भारतको आधार कार्ड लिएर भारतीय बन्नुपर्ने बताएपछि खेलाडीहरु फर्किएका हुन् ।

क्लबले सुरुमा एलिट स्तरमा छनोट हुने खेलाडीको सम्पूर्ण निशुल्क हुने भनेपनि खेलाडीहरु आफ्नो आवत-जावत खर्च पूरै बेहोरेर निराश हुँदै नेपाल फर्केका छन् । क्लबले त्यहाँ पुगेपछि भने केही समय किकस्टार्टको एकेडेमीमा प्रशिक्षण गर्नुपर्ने र त्यसपछि मात्र टोटेनहम जान सम्भव हुने बताएको खेलाडीले गुनासो गरे ।

सुरुवातमा नेपालबाट नै छनोट हुँदै भारतमा दोस्रो चरणको छनोट हुने भनेपनि किकस्टार्टको एकेडेमीमा रहेर प्रशिक्षण गर्न मात्र यो छनोट भएको तथ्य बाहिर आएको छ । टोटेनहमसँग यस्तो कुनै सम्झौता नभएकाले एकेडेमीसम्म पुग्ने बाटो नेपाली खेलाडीको लागि हाल सम्भव छैन । तर किकस्टार्टले यसमा अवैध रुपमा कार्यक्रम संचालन गरेर नेपाली खेलाडीलाई झुक्याउँदै आफ्नो एकेडेमी प्रयोग गर्न बाध्य बनाएको छ ।

नेपालबाट छनोट चरणमा सहभागी ३६ खेलाडीहरु मध्ये ५ खेलाडीहरुले पूर्ण छात्रवृत्ति प्राप्त गरेको टोखाले जानकारी दिएको छ । तर पूर्ण छात्रवृत्ति पाएका भनिएका खेलाडी नेपाल फर्किसकेका छन् । दोस्रो चरणमा मंगलबार बेंगलोर लागेका अन्य खेलाडीहरुले ९० प्रतिशत देखि १० प्रतिशत सम्मको छात्रवृत्ति प्राप्त गरेको टोखाले जनाएको छ ।

टोटेनहमले वार्षिक रुपमा विश्वभरबाट आफ्नो कार्यक्रम भएका ४५ हजार भन्दा बढी खेलाडीलाई प्रशिक्षण दिने गर्दछ । टोटेनहमले किकस्टार्टसँगको आफ्नो सहकार्यमा स्थानीय प्रशिक्षक र खेलाडीको विकासमा सहयोग गर्न चाहेको मात्र बताएको छ । टोटेनहमले प्राविधिक सहयोग गर्ने र युवा टोलीको केहि विशेष खेलाडीलाई एकेडेमीमा गएर प्रशिक्षणको अवसर दिने बताएको छ ।

यसै अनुरुप किकस्टार्टले केहि महिनाअघि लन्डन पुगेर ८ ओटा प्रशिक्षण सेसन पनि लियो । अफ सिजनमा क्लबहरुले युवा परियोजना अन्तर्गत गर्ने कार्यक्रममध्य यो पनि एक थियो । तर यहाँ एकेडेमीमा खेलाडी पुर्याउने जस्ता केही पक्ष उदृत गरिएको छैन । टोटेनहम आफैंले पनि एकडेमीमा नेपाली खेलाडी लग्ने कुनै प्रावधान नरहेको हाम्रो खेलकुदलाई बताएको छ ।

टोटेनहमको वैधानिक ‘प्लेयर डेभलपमेन्ट पाथवे’ पनि रहेको छ । जसमा खेलाडी विकास कार्यक्रमबाट ५ चरणको छनोट पार गरेपछि मात्र खेलाडी एकेडेमीसम्म पुग्छन् । तर यस परियोजनामा नेपाल क्षेत्र पर्दैन । भारतमा पनि टोटेनहम र किकस्टार्टको परियोजना हालसम्म पूर्ण रुपमा सुरु भएको छैन ।

टोखाले खेलाडी छनोट गर्दा च्यासल मैदान र एन्फा कम्प्लेक्सको मैदान प्रयोग गरेको थियो । एन्फाले यो कार्यक्रम क्लब आफैंले गरेको र यसमा एन्फाको कुनै संलग्नता नरहेको समेत प्रष्ट पारेको छ । ‘क्लबले यस्तो कार्यक्रम गर्ने हो । हामीसँग स्वीकृति लिनुपर्छ भन्ने हुँदैन । एन्फाको मैदान पनि वहाँहरुले अन्य कार्यक्रमजस्तो प्रयोग गर्न भाडामा लिनुभएको हो । एन्फाले यसमा कुनै भूमिका खेलेको छैन,’ एन्फा महसचिव किरण राईले हाम्रो खेलकुदलाई बताए ।

दोस्रो चरणका ४६ खेलाडी मंगलबार उडे

क्लबका पूर्व अध्यक्ष प्रकाश श्रेष्ठ तथा व्यवस्थापक राजु विक्रम थापाको नेतृत्वमा ४६ सदस्यीय टोली मंगलबार बेङ्गलोरको किक स्टार्ट फुटबल क्लब (एफसी) प्रस्थान गरे । संयोजक जोशीले उत्कृष्ट खेलाडीको रुपमा छनोट हुन सफल खेलाडीहरुले किकस्टार्ट एफसीमा प्रशिक्षण प्राप्त गर्ने र प्रशिक्षणमा उत्कृष्ट खेलाडीहरुले टोटनह्याममा सहभागीता जनाउने प्रेस विज्ञप्तिमा बताएका थिए । तर टोटेनहम र किकस्टार्टको सहकार्यबारे यथार्थ थाहा पाएपछि भने उनले क्लबसँग विस्तृत जानकारी लिनुपर्ने बताए ।

बेङ्गलोर गएको टोलीले त्यहाँ तीन दिन सम्म शारिरीक, खेल कौशलता परिक्षणका साथै अन्य प्रशिक्षण र किक स्टार्टले आयोजना गरेको प्रतियोगितामा सहभागिता जनाउने विज्ञप्तिमा उल्लेख छ ।

किकस्टार्टले एक त आफ्नो क्षेत्राधिकार नै नपर्ने नेपालमा खेलाडी छनोट गरेको छ । यसमा श्री भगवती क्लब टोखा र अन्य आवद्द संस्था र व्यक्तिहरु पनि झुक्याइएको महसुस गरिरहेका छन् । किकस्टार्टले आफ्नो एकडेमीमा नेपाली खेलाडी भर्ती गर्न यो कदम चालेको आँकलन गरिएको छ ।

विगतमा पनि युरोपका ठूला क्लबको नाम जोडिएका प्रशिक्षण कार्यक्रमले आफ्नो योजनामा प्रशिक्षण गर्नेमा मात्र सिमित राख्थे । त्यसबाट खेलाडी क्लबमा पुगेर प्रशिक्षण मात्र गर्ने प्रष्ट हुन्थ्यो, तर ‘रोड टु टोटेनहम’ नाम राखेर एकडेमीसम्म पुर्याउने भन्ने झुटो खबरले खेलाडी पनि ठगिएका छन् ।