एजेन्सी – इङ्ल्यान्ड राष्ट्रिय फुटबल टोलीका मुख्य प्रशिक्षक ग्यारेथ साउथगेट जिम्मेवारीबाट अलग भएका छन् ।

साउथगेटले युरो कप फाइनलको हारपछि मुख्य प्रशिक्षक पदबाट राजीनामा दिएको इङ्ल्यान्ड फुटबल एसोसिएसनले जनाएको हो ।

जर्मनीमा आइतबार भएको फाइनलमा इङ्ल्यान्ड स्पेनसँग २-१ ले पराजित भएको थियो । यो साउथगेटको प्रशिक्षणमा इङ्ल्यान्डको लगातार दोस्रो युरो कप फाइनल हार थियो । यसअघि इङ्ल्यान्ड सन् २०२१ मा भएको फाइनलमा इटालीसँग टाइब्रेकरमा पराजित भएको थियो ।

२०१६ को युरोपछि टोलीमा आएका साउथगेटले ८ वर्ष टोलीको प्रशिक्षण सम्हाले । साउथगेटले इंग्ल्याण्डको तेस्रो सबैभन्दा लामो समय सेवा गर्ने प्रशिक्षकका रूपमा आफ्नो पद छाडेका छन् ।

उनको नेतृत्वमा इङ्ल्यान्डले १ सय २ खेल खेलेको थियो। जसमध्ये टोलीले ६१ खेलमा जित हासिल गरेको थियो । उनी देशको सबैभन्दा सफल प्रशिक्षक मध्ये एकको रूपमा चिनिनेछन् ।

साउथगेटको सम्झौता यस वर्षको डिसेम्बरमा समाप्त हुने थियो । उनले जुनमा यस वर्षको युरो कप सम्भवतः राष्ट्रिय टोलीको नेतृत्वमा उपाधि जित्ने आफ्नो लागि अन्तिम मौका रहेको स्वीकारेका थिए ।

साउथगेटले मंगलबार बिहान एक विज्ञप्ति जारी गर्दै खेलाडी, कर्मचारी र समर्थकलाई धन्यवाद दिए ।

‘एक गौरवशाली देशवासीको रूपमा, इङ्ल्यान्डका लागि खेल्नु र इङ्ल्यान्डलाई प्रशिक्षण गर्न पाउनु मेरो जीवनको सम्मान हो । यसले मेरो ठूलो अर्थ राखेको छ, र मैले आफ्नो सबै कुरा दिएँ’, ५३ वर्षीय साउथगेटले भने ।

उनले अगाडि भनेका छन्, ‘तर यो परिवर्तनको र नयाँ अध्यायको समय हो । आतबारको बर्लिनमा स्पेन विरुद्धको फाइनल इंग्ल्याण्डको प्रशिक्षक रूपमा मेरो अन्तिम खेल थियो । म २०११ मा इंग्लिस फुटबल सुधारका निम्ति एफएमा आबद्ध भएँ । इङ्ल्यान्डको पुरुष टोलीको प्रशिक्षकका रूपमा ८ वर्षसम्म मलाई समर्थन गर्ने सबैमा मेरो हृदयदेखि धन्यवाद छ ।’

युरो २०१६ मा आइसल्याण्डसँगको लज्जास्पद हारपछि साउथगेटलाई नियुक्त गरिएको थियो । यो ८ वर्षमा इङ्ल्यान्डले उनको प्रशिक्षणमा २ विश्वकप र २ युरो कप खेल्यो ।

सबै ४ प्रतियोगितामा इङ्ल्यान्ड प्रतियोगिताको अन्तिम चरणमा पुग्न सफल त रह्यो तर उपाधि भने जित्न सकेन । उनको रक्षात्मक फुटबल रणनीतिले इंग्लिस समर्थकबीच नै विभाजित प्रतिक्रिया आउने गरेको थियो । उत्कृष्ट खेलाडीको समिश्रणका बाबजुद टोलीले सकारात्मक फुटबल खेल्न नसक्दा उनी लगातार दबाबमा थिए ।