काठमाडौं (हाम्रो खेलकुद) – फिफा विश्वकप २०२६ एसियाली छनोटको दोस्रो चरणको अन्तिम खेलमा नेपालले पहिलो गोल गरेको छ । अघिल्लो ५ खेलमा गोल र जित विहिन नेपालले साउदी अरबको दम्माम शहर स्थित प्रिन्स मोहमद विन फहद स्टेडियममा जारी खेलमा गोल गर्न सफल भएको हो ।

नेपालले खेलको २३औं मिनेटमा गोल गरेको हो । एक गोलले पछि परेको अवस्थामा डिफेन्डरले किपरका लागि खेलेको ब्याकपासमा बल भेटाउँदै सञ्जीव विष्टले बक्स भित्रबाट खेलमा बराबरी गोल गरेका थिए । यो उनको अन्तराष्ट्रिय करियरको पहिलो आधिकारिक गोल समेत हो ।

नेपालले हालसम्म कुनै पनि गोल नगर्दा ५ खेलमा १८ गोल खान पुगेको थियो । तर पछिल्लो खेलमा केही सुन्दर अवसर गुमाएको। नेपालले अन्ततः नेपालले गोल गर्न सफल भएको हो ।

खेल मध्यान्तर सम्म १-१ को बराबरीमा रहेको छ । सञ्जीवको सो गोल अघि खेलको नवौं मिनेटमा पेनाल्टी मार्फत नेपालले गोल खान पुगेको थियो । बक्स भित्र मनिष डाँगीले रमी अल-वासमानी माथि फाउल गरेपछि पाएको पेनाल्टीमा नसीम अल-गाहवाहीले गोल गर्दै यमनलाई अग्रता दिलाएका थिए ।

पछिल्लो खेलमा राष्ट्रिय टोलीका लागि डेब्यु गरेका मिडफिल्डर बसन्त जिम्बाको स्थानमा डिफेन्डर सनिश श्रेष्ठलाई टोलीमा ल्याउँदै नेपालले आज १ परिवर्तन गरेको छ ।

यी दुई बीच भएको पहिलो खेलमा यमनले नेपाल माथि २-० को जित निकालेको थियो ।