दिपक बोहोरा
झापा – पछिल्लो एक महिनामा लक्ष्मी हुन्डाई मनाङ मस्र्याङ्दी क्लब चौथो नकआउट फुटबल प्रतियोगिताको फाइनलमा पुगेको छ । शुक्रबार दस खेलाडीमा सिमित त्रिभुवन आर्मी क्लबलाई १–० ले हराउँदै मनाङ दोस्रो रमपम झापा गोल्डकप फुटबल प्रतियोगिताको फाइनल पुगेको छ । टोलीले आयोजक झापा ११ सँग सोमबार फाइनल खेल्नेछ ।

पुस २३ गते टुबोर्ग हेटौडा गोल्डकप फुटबल प्रतियोगिताको फाइनलमा आर्मीसँग पराजित मनाङले यसपटक भने बदला लिएको छ । बिमल रानाले पहिलो हाफमा गरेको गोलनै मनाङलाई चार सातामा चौथो नकआउट प्रतियोगिताको फाइनलमा पुग्न सफल रह्यो । माघको पहिलो साता सुदूरपश्चिमाञ्चल खप्तड गोल्डकप जितेको मनाङले गत शनिबार पोखरामा आहा रारा गोल्डकप फुटबल प्रतियोगिताको उपाधि जितेको थियो ।
डोमलाल रङशालामा खेलको ४२ औ मिनेटमा सुजल श्रेष्ठको प्रहार बारमा लागेर फर्केको रिबाउन्डमा बिमलले गरेको खेल नै खेलको निर्णायक बन्यो । जन्म दिन समेत परेका कप्तान सुजन खेलको म्यान अफ दी म्याच बने र उनले ७ हजार रुपैयाँ प्राप्त गरे । अन्तिम ३० मिनेट आर्मी दस खेलाडीमा सिमित भएको थियो । ६० औं मिनेटमा आर्मीका सुमन अर्याल दोहोरा पहेलो कार्ड पाएपछि मैदान बाहिरिएका थिए ।
झापामा मनाङ आफ्नो पहिलो खेलमा न्युरोड टिम एनआरटिलाइ ४–० ले हराउदै सेमिफाइनल प्रबेश गरेको हो । भने त्रिभुवन आर्मी क्लब रुपन्देहि ११ लाइ २–० ले हराउदै अन्तिम चारको यात्रा तय गरेको थियो ।