काठमाडौं (हाम्रो खेलकुद) – नेपाली राष्ट्रिय फुटबल टोलीका मिडफिल्डर जगजित श्रेष्ठले अस्ट्रेलियाको सनसाइन जर्ज क्रस एफसीबाट बुधबार ‘डेब्यू गरेका छन् । ’ भिक्टोरिया प्रिमियर लिगमा सनसाइनले मोरल्यान्ड जेब्राजसँगको पहिलो खेलमा २–२ को बराबरी खेलेको छ ।

पहिलो हाफमा २–० ले पछि परेको खेल उल्टाउँदै सनसाइन जर्जले खेललाई बराबरी गरेको थियो । सनसाइनले दुवै गोल दोस्रो हाफमा गरेको थियो । जगजित दोस्रो हाफमा मैदान प्रवेश गर्दै ‘डेब्यू’ थिए । अवे खेल निकै कठिन रहेको जगजितले हाम्रो खेलकुदलाई बताए । उनले भने ‘गर्मी पनि थियो । खेल्न अलि गाह्रो भयो । टोलीका प्रशिक्षकले पनि मेरो प्रदर्शन ठिकै भएको बताए । अझै मेहनत गर्नुछ ।’
एक बर्षमा जगजितले दोस्रो अस्ट्रेलियन क्लबमा आबद्ध भएका छन् । उनी केही दिन अघि सनसाइनमा आबद्ध भएका थिए ।
यसै बर्षको सुरुआत तिर अस्ट्रेलिया पुगेका जगजितले साउनमा भिक्टोरिया स्टेटको बी डिभिजन टोली ह्युम युनाइटेड एफसीबाट तीन महिना खेलेका थिए । त्यति बेला उनले १ हजार ५ सय अमेरिकी डलर मासिक पारिश्रमिक लिन्थे । गैर अस्ट्रेलियन २ खेलाडी राख्न पाउने प्रावधान अनुसार जर्जले उनलाई क्लबमा समेटेको हो । भिक्टोरियाको प्रिमियर लिगमा २० क्लब छन् ।
नेपालले गत बर्ष दुई महत्वपूर्ण उपलब्धी हासिल गर्दा जगगित पनि टोलीका सदस्य थिए । फागुनमा भारतमा १२ औं दक्षिण एसियाली खेलकुदमा यू २३ ले स्वर्ण पदक जित्नुअघि राष्ट्रिय टोलीले माघमा बंगलादेशमा बंगबन्धु गोल्डकप जित्दा जगजित टोलीमा थिए । दुई महिना अघि नेपालले एएफसी सोलिडारिटी कप जित्दा भने उनी टोलीमा थिएनन् ।