सुमन अधिकारी, बुटवल

रुपन्देही जिल्ला ‘ए’ डिभिजन लिग शनिबारदेखि बुटवलमा सुरु हुने भएको छ । लिगको उद्घाटन खेल शनिबार दिउँसो ३ः३० बजे एन्फा मैदानमा साविक विजेता सुनौलो संगम र हिमाल युथ क्लब बीच सुरु हुने लिग आयोजक रुपन्देही जिल्ला फुटवल संघले जनाएको छ ।

बुटवल उपमहानगरपालिका–११ स्थित एन्फाको खेल मैदानमा हुने प्रतियोगिताका लागि ‘ए’ डिभिजनमा रहेका ७ वटा क्लब तथा बी डिभिजन लिगबाट छनोट भई बढुवा भएका २ वटा क्बल गरी ९ टिम बीच प्रतिस्पर्धा हुने शुक्रबार पत्रकार सम्मेलनमा संघका अध्यक्ष लोक पुनले जानकारी दिए ।

राउण्ड रोबिनका आधारमा हुने प्रतियोगितामा कुल ३६ खेल हुने छन् । प्रतियोगिताको विजेता १ लाख र दोस्रोले ५० हजार, तेस्रोले ३० र चौथो टोलीले २० हजार रुपैयाँ प्राप्त गने लिग संयोजक तथा संघका उपाध्यक्ष मुकेश कुंवरले जानकारी दिए ।

जिल्लामा ए डिभिजन क्लब छनोटका लागि आयोजना गरिने यो लिगबाट अंक तालिकाको पुछारका रहने २ टोली बी मा घटुवा हुनेछन् । अन्य क्लब डिभिजन ए मा कायम रहने छन् । प्रतियोगितामा यो वर्ष समुह एमा बढुवा भएका हिमाल युथ क्लब र सिम्रिक युथ क्लबसँगै साविक विजेता सुनौलो संगम युवा क्लब, गोर्खा ब्वाईज, बुटवल युनाइटेड, सौभाग्य युवा क्लब, फर्साटिकर युवा क्लब, लिस्नु युवा क्लब र डिएमसी सहभागी छन् ।