एजेन्सी – लगातार तीन पटकको विजेता र लगातार चौथो पटक इंग्लिश प्रिमियर लिग उपाधिको खोजमा रहेको म्यानचेस्टर सिटी तालिकाको शीर्ष स्थानमा उक्लिएको छ । शनिबार भएको पहिलो खेलमा फुलहम माथि ४-० को फराकिलो जित दर्ता गर्दै लिग तालिकाको शीर्ष स्थानमा उक्लिएको छ ।

सिटीको जितमा डिफेन्डर जोस्को ग्वार्डीओलले दुई गोल गरे भने फिल फोडेन र जुलियन अल्भारेजले एक-एक गोल गरे ।

१३औं मिनेटमा केभिन डीब्रुइनको पासमा गोल गर्दै ग्वार्डीओलले सिटीलाई अग्रता दिलाएका थिए । सो अग्रता ५९औं मिनेटमा फोडेनले दोब्बर बनाए । बक्सको छेउमा पाएको मौकामा उनले राम्रो फिनिश गर्दै सिटीलाई दुई गोलको अग्रता दिलाएका थिए ।

७१औं मिनेटमा ग्वार्डीओलले व्यक्तिगत दोस्रो गोल गरे । बर्नार्डो सिल्भाको क्रसमा फार-पोस्टमा सहज गोल गर्दै उनले अग्रता तीन गोलको बनाए ।

त्यसपछि मैदान प्रवेश गरेका अल्भारेजले इन्ज्युरी समयमा पेनाल्टी मार्फत गोल गर्दै जित सुनिश्चित गरे ।

जित पछि सिटीले शीर्ष स्थानमा रहँदै उपाधि जित्ने मौका आफ्नो हातमा पाएको छ । लिगमा बाँकी दुई खेलमा जित हासिल गरे सिटीले उपाधि जित्नेछ । दोस्रो स्थानमा रहेको आर्सनलले कुनै एक खेलमा हार बेहोरेको अवस्थामा सिटीले एक जित पछि नै लिग उचाल्ने छ ।

सिटीको ३६ खेलमा ८५ अंक रहेको छ । यस्तै दोस्रो स्थानको आर्सनलको ८३ अंक छ ।

सिटीले टोटेनहम र वेस्ट ह्याम विरुद्ध खेल्न बाँकी रहेको छ भने आर्सनलले म्यानचेस्टर युनाइटेड र एभर्टन विरुद्ध खेल्न बाँकी रहेको छ ।

प्रिमियर लिगमा आज थप ७ खेल हुँदै छन् ।