च्याम्पियन्स लिग सेमिफाइनलमा डर्टमुण्ड र पिएसजी भिड्दै

एजेन्सी – युरोपेली च्याम्पियन्स लिग अन्तर्गत दोस्रो सेमिफाइनलको पहिलो लेगमा आज राती बोरुसिया डर्टमुण्ड र पेरिस सेन्ट जर्मान (पिएसजी) भिड्दै छन् । राती १२:४५ बजे सुरु हुने खेल डर्टमुण्डको घरेलु मैदान सिग्नल इडुना पार्कमा सुरु हुनेछ ।

यी दुवै टोली यसै सिजन च्याम्पियन्स लिगको एकै समूहमा रहेका थिए । समूह चरणको दुई खेल मध्य एक खेल १-१ को बराबरीमा सकिएको थियो भने अर्को खेलमा पिएसजी २-० ले विजयी भएको थियो । समूहमा डर्टमुण्डले शीर्ष स्थान हासिल गर्दा पिएसजी दोस्रो भएको थियो ।

डर्टमुण्डले अन्तिम १६ मा डच क्लब पिएसभी आइन्ढहोभन माथि समग्रमा ३-१ को जित निकालेको थियो भने क्वाटरफाइनलमा स्पेनिश क्लब एट्लेटिको म्याड्रिडलाई समग्रमा ५-४ ले हराएको थियो ।

उता पिएसजीले भने अन्तिम १६ मा स्पेनिश क्लब रियल सोसेईडाड माथि ४-१ को जित निकाल्दा क्वाटरफाइनलमा अर्को स्पेनिश क्लब बार्सिलोनालाई ६-४ ले पराजित गरेको थियो ।

यो टाईको विजेताले फाइनलमा बायर्न म्युनिख र रियल म्याड्रिड बीचको अर्को सेमीफाइनल विजेता विरुद्ध खेल्नेछ । सो टाईको पहिलो लेग २-२ को बराबरीमा सकिएको छ ।