काठमाडौं (हाम्रो खेलकुद) – इङ्ल्यान्ड ‘सि’ टोली र ब्रिटिश आर्मी फुटबल टोली विरुद्ध मैत्रीपूर्ण खेल खेल्न इङ्ल्यान्ड प्रस्थान गर्ने नेपाली राष्ट्रिय फुटबल टोलीको विदाई भएको छ । अखिल नेपाल फुटबल संघ (एन्फा) ले एन्फा कम्प्लेक्स, सातदोबाटोमा भएको एक कार्यक्रमका बीच सोमबार टोलीको विदाई गरेको हो ।

कार्यक्रमका नेपालका लागि बेलायती राजदूत रब फेन समेत उपस्थित रहेका थिए । राजदूत फेनले फुटबल टोलीलाई शुभकामना दिँदै आफूले टोलीलाई पूर्णरूपमा समर्थन गर्ने कुरा व्यक्त गरे ।

यस्तै एन्फा अध्यक्ष पंकज विक्रम नेम्वाङले खेलकुदको माध्यमबाट नेपाल र बेलायतको सम्बन्ध अझ प्रगाढ हुने जिकिर गरे । यस्तै नेम्वाङले नेपाली टोलीले राम्रो खेल प्रदर्शन गर्ने शुभकामना दिँदै साथै बेलायतमा रहेका नेपालीहरुसँग राम्रो सम्बन्ध जोड्न आह्वान गरे । यस्तै कर्मा छिरिङ शेर्पा अध्यक्ष रहँदाको कार्यसमितिलाई यस भ्रमणका लागि सुरुवाती पहल गरेकोमा धन्यवाद समेत व्यक्त गरे ।

एन्फाले इङ्ल्यान्ड भ्रमणमा जाने २३ सदस्सीय नेपाली टोलीको घोषणा समेत गरिसकेको छ । नेपाली टोलीले मे ३ मा ब्रिटिश आर्मी टोली र मे ६ मा इङ्ल्यान्ड ‘ को सामना गर्नेछ । दुवै खेल एल्डरशट टाउनको घरेलु मैदान इबिबी स्टेडियममा हुनेछ ।

नेपाली टोली:

गोलकिपर: किरण चेम्जोङ, अभिषेक बराल, विशाल सुनार

डिफेन्डर: विमल पाण्डे, रोहित चन्द, छिरीङ लामा, अभिषेक लिम्बू, विशाल बस्नेत, सनिश श्रेष्ठ, सौभाग्य राई (सन्जित), योगेश गुरुङ

मिडफिल्डर: फत्तेमान घले, मणि कुमार लामा, लाकेन लिम्बू, भरत खवास, उत्सव राई, मनिष डाँगी

फरवार्ड: अन्जन विष्ट, जिलेस्पी जंग कर्मी, सञ्जीव विष्ट, दिनेश हेन्जन, हिसुब थपलिया, समिर तामाङ