सुदूरपश्चिमको जितमा यशोदाको ह्याट्रिक

काठमाडौं (हाम्रो खेलकुद) – यशोदा चिरालको ह्याट्रिकमा सुदूरपश्चिम प्रदेशले महिला लिग छनोटमा शनिबार बागमती प्रदेशलाई एकपक्षीय खेलमा ६–० ले हराएको छ। छनोटमा सुदूरपश्चिमको यो तेस्रो जित हो । बागमतीको भने यो लगातार चौथो हार हो।

सर्खेतस्थित कर्णाली प्रदेश रंगशालामा सुदूरपश्चिमले आधा दर्जन गोल गर्ने क्रममा यशोदाले २६ औं मिनेटमा गोलको खाता खोलिन् । २९औं मिनेटमा बिर्सना चौधरीले अग्रता दोब्बर पारिन् । ४४औं मिनेटमा यशोदाले व्यक्तिगत दोस्रो गोल गर्दा पहिलो हाफमा सदूरपश्चिमले ३–० को अग्रता बनायो ।

दोस्रो हाफमा पनि बागमतीको प्रदर्शन फितलो रह्यो। ७१औं मिनेटमा यशोदाले अर्को गोल गर्दै ह्याट्रिक पूरा गरिन् । सुदूरपश्चिको गोल त्यतिमा मात्र रोकिएन । ८१ र ८९औं मिनेटमा मीना देउवाले २ गोल गर्दा सुदूरपश्चिमले फराकिलो जित दर्ज गर्यो। सुदूरपश्चिमकी यशोदा प्लेयर अफ दि म्याच घोषित भइन् ।

चौथो खेलमा तेस्रो जित सहित ९ अंक बनाएको सुदूरपश्चि अंक तालिकाको दोस्रो स्थानमा छ । चार खेलमा शतप्रतिशत जित निकालेको कोशी १२ अंक सहित शीषस्थानमा छ । बागमतीले भने चौथो खेलमा पनि अंकको खाता खोल्न सकेन।