कर्णालीको जितमा बागमतीको तेस्रो हार

सुर्खेत (हाम्रो खेलकुद) – महिला लिग छनोटमा कर्णाली प्रदेशले बुधबार बागमती प्रदेशलाई ३–२ ले पराजित गरेको छ । छनोटमा घरेलु टोली कर्णालीको तेस्रो खेलमा यो दोस्रो जित हो । बागमतीले भने अंकको खाता खोल्न सकेको छैन ।

सर्खेतस्थित कर्णाली प्रदेश रंगशालामा भएको खेलको ४१ औं मिनेटमा सुनकला राईले गोल गर्दै कर्णालीलाई अग्रता दिलाइन् । तर अग्रता ३ मिनेटपछि नै तोडियो । बागमतीले पेनाल्टीको अवसर पायो । सुमित्रा तामाङले पेनाल्टीमा गोल गर्दै खेललाई १–१ को बराबरीमा पुर्याइन् ।

पहिलो हाफको इन्जुरी समयमा ललिता कुमारी भाटले गोल गरेपछि पहिलो हाफमा कर्णाली दोस्रो पटक अग्रता लिएको थियो ।
दोस्रो हाफमा बागमती खेलमा फर्कन सकेन । खेल सकिन एक मिनेट बाँकी रहँदा गरिमा राईले अर्को गर्दै अग्रतालाई ३–१ बनाइन् । इन्ज्युरी समयमा सुनमाया गुरुङले बागमतीका लागि गोल गरेपनि टोलीको हार टरेन ।

३ खेलमा कर्णालीको ६ अंक छ । बागमतीको भने यो लगातार तेस्रो हार हो । सहभागी ७ प्रदेशमा बागमतीले मात्र अंकको खाता खोलेको छैन ।