काठमाडौं (हाम्रो खेलकुद)– नेपाली यू १६ का पूर्व कप्तान हेमन्त थापामगरले आज लक्ष्मी हुन्डाई मनाङ मस्र्याङ्दी क्लबबाट ‘डेब्यू’गर्ने सम्भावना छ ।

झापामा जारी दोस्रो रमपम झापा गोल्डकप फुटबल प्रतियोगितामा आज क्वार्टरफाइनलमा मनाङले न्यू रोड टिम (एनआरटी)को सामना गर्दैछ । शनिबार पोखरामा सम्पन्न आहा रारा गोल्डकपमा नै टोलीमा समेटिएपछि हेमन्तले डेब्यू गर्न पाएका छैनन् ।

मनाङका प्रशिक्षक छिरिङ लोप्साङका अनुसार उनले आज डेब्यू गर्ने सम्भवना छ । ‘आहा राराको फाइनलमा खेलाउने योजना थियो । तर परिस्थिति त्यस्तै भयो ’ उनले भने, ‘आज पनि सुरुआती ११ मा त छैनन् । तर दोस्रो हाफमा खेलाउन सकिन्छ ।’ गत बर्ष सुदूरपश्चिमाञ्चलबाट राष्ट्रिय लिग खेलेका हेमन्तको मनाङ पहिलो ए डिभिजन क्लब हो । ‘मनाङ जस्तो नेपालका सफल क्लबहरु मध्येको बाट खेल्न पाउनु मेरो लागि ठूलो अवसर हो ’ धरानका २० बर्षे सेन्ट्रल मिडफिल्डले भने, ‘टिममा धेरै राम्रो खेलाडीहरु हुनुहुन्छ । मौका पाए भने आफ्नो क्षमता अनुसारको प्रदर्शनको प्रयास गर्नेछु ।’ गत बर्ष नेपालले साफ यू १९ फुटबल उपाधि जित्दाका महत्वपूर्ण सदस्य हेमन्तको अरुको जस्तै राष्ट्रिय टोलीबाट खेल्ने सपना छ । उनी थप्छन्,‘हरेक खेलाडी राष्ट्रिय टोलीबाट खेल्न चाहन्छ ।

तर त्यो अघि मैले आफुलाई क्लब फुटबलमा प्रमाणित गर्नुपर्छ । त्यसका लागि मनाङबाट खेल्न पाउनु ठूलो अवसरका रुपमा लिएको छु ।’ उनी गत बर्ष बंगलादेशसँगको मैत्रीपूर्ण खेलका लागि राष्ट्रिय टोलीमा समेटिएपनि डेब्युको मौका भने पाएनन् । राष्ट्रिय लिग यता हेमन्तले केही घरेलु प्रतियोगिताका साथै भारतको सिलोङमा केही खेल खेलेको बताएका छन् ।