लन्डन (एजेन्सी)– गाब्रियल जेसुसले इङ्लिस फुटबलमा पहिलो गोल गरेको प्रिमियर लिगको खेलमा म्यानचेस्टर सिटीले वेस्ट ह्याम युनाइटेडाई ४–० ले हराएको छ । तर, गए रातीनै सिटीको सहरी प्रतिद्वन्द्वि म्यानचेस्टर युनाइटेड भने हल सिटीसँग गोलरहित बराबरीमा रोकिएको छ । जितपछि सिटीले शीर्षस्थानको चेल्सीसँगको दुरीलाई छोट्याएको छ । 

१७ औं मिनेटमा केभिन डी ब्रुनेको गोलमा पास मिलाइ दिएका ब्राजिलियन अन्तर्राष्ट्रिय जेसुसले रहिम स्टेर्लिङको पासमा ३९ औं मिनेटमा टोलीका लागि तेस्रो गोल गरेका थिए । त्यसअघि २१ औं मिनेटमा डेभिड सिल्भाले दोस्रो गोल गरेका थिए । दोस्रो हाफमा याया टाउरेले पेनाल्टीमा टोलीका लागि चौथो गोल गरे । जोसे फोन्टेले स्टेर्लिङलाई फाउल हानेपछि सिटीले पेनाल्टी पाएको थियो ।
अघिल्लो दिन आर्सनल वाटफोर्डसँग हार्नु, टोटेनह्यामले सन्डरल्यान्डसँग बराबरी खेल्नु, लिभरपुल र चेल्सीले अंक बाड्नु र युनाइटेड पनि बराबरीमा रोकिनुले सिटीलाई त्यसको फाइदा पुगेको छ । पेप ग्वार्डिओलाको टोली पाँचौं स्थानमा छ । तर दोस्रो स्थानको टोटेनह्यामभन्दा मात्र एक अंकले पछाडी छ ।

शीर्षस्थानको चेल्सीको ५६ अंक छ भने टोनेटह्याम र तेस्रो स्थानको आर्सनलको समान ४७ अंक, चौथो स्थानको लिभरपुल र सिटीको ४६ अंक छ । ४२ अंकका साथ युनाइटेड छैटौं स्थानमा छ । प्रिमियर लिगमा बुधबार अर्को खेलमा स्टोक र एभर्टनले १–१ को बराबरी खेलेका थिए ।