काठमाडौं (हाम्रो खेलकुद) – सहिद स्मारक सि डिभिजन लिग अन्तर्गत बुधबार भएको खेलमा सानेपा क्लब विजयी भएको छ । एन्फा कम्प्लेक्समा भएको दिनको दोस्रो खेलमा सानेपा क्लबले स्वयम्भू क्लब माथि २-१ को जित निकालेको हो ।

सानेपाको लागि पेम्बा दोर्जे र निरञ्जन जंग शाहीले १-१ गोल गरे । पराजित स्वयम्भूका लागि सुग्रीत मगरले एक गोल गरेका थिए ।

जित सँगै सानेपाको ३ खेलमा ४ अंक पुगेको छ । यस्तै पराजित स्वयम्भूको ३ खेलमा १ अंक मात्र रहेको छ ।

त्यसअघि दिनको पहिलो खेलमा समाज कल्याण खेलकुद केन्द्र र खालीबारि युथ क्लबले १-१ को बराबरी खेले । समाज कल्याणका लागि निरज परियारले एक गोल गरे भने खालीबारीका लागि रोनल राईले गोल गरे ।

बराबरी पछि समाज कल्याणको ३ खेलमा ५ अंक भएको छ भने खालीबारीको ३ खेलमा २ अंक भएको छ ।

सो डिभिजनमा बिहीबार दुई खेल हुँदै छन् । दिनको पहिलो खेलमा १ बजे पुल्चोक स्पोर्ट्स क्लब र झम्सिखेल युथ क्लब भिड्ने छन् भने ४:१५ बजे रानीवन स्पोर्ट्स क्लब र स्पोर्ट्स एकेडेमी साँगा भिड्ने छन् ।

सिंगल राउण्ड रोबिन ढाँचामा खेलाईने लिग विजेताले १० लाख रुपैयाँ पुरस्कार पाउने छ । दोस्रो हुने टोलीले ७ र तेस्रो हुने टोलीले ५ लाख पुरस्कार पाउने छ । यस्तै उत्कृष्ट खेलाडीको ५०,००० रुपैयाँ पाउने छन् भने उत्कृष्ट गोलकिपर र सर्वाधिक गोलकर्ताले जनही ३५,००० रुपैयाँ पाउने छन् ।