सुनिल गाउँले, सिमरा

मच्छिन्द्र फुटबल क्लब जगदम्बा स्टिल १४ औं जीतपुरसिमरा गोल्डकपको फाइनलमा पुगेको छ । सिमरा रंगशालामा बिहीबार भएको पहिलो सेमिफाइनलमा सिराहाको सलहेश युवा क्लबलाई २–० ले हराउँदै मच्छिन्द्रले उपाधि भिडन्त पक्का गरेको हो ।

मच्छिन्द्रले अब उपाधिका लागि शनिबार एपिएफ र पुलिसबिच हुने विभागीय डर्बीको विजेतासंग खेल्नेछ । मच्छिन्द्रको जितमा विमल घर्ती मगर र देवेन्द्र तामाङले गोल गरे । मच्छिन्द्रले दुबै गोल खेलको पहिलो हाफमै गरेको थियो ।

खेलको ३० औं मिनटमा विमलको गोल मार्फत मच्छिन्द्रले अग्रता बनाएको थियो । पेनाल्टी बक्स बाहिरबाट छिरिङ गुरुङले दिएको पासलाई विमलले सिराहाको बक्सभित्र नियन्त्रणमा लिंदै गोल गरेका थिए । पहिलो हाफको इन्जुरी समयमा देवेन्द्रले गोल गर्दै मच्छिन्द्रको अग्रता दोब्बर पारे । अभिषेक गुरुङको कर्नर बलमा देवेन्द्रले हेडिङ मार्फत गोल गरेका थिए ।

राष्ट्रिय टिमका अनुभवी खेलाडी सहित मैदान उत्रिएको मच्छिन्द्र सामु सिराहाका खेलाडी दबाबमा देखिन्थे । पहिलो हाफमा मच्छिन्द्रविरुद्ध आक्रामक खेल खेलेपनि खेलमा पछि परेपछि सिराहाका खेलाडी लयमा देखिएनन् । विमल, मनिष डाँगी जस्ता खेलाडी सहित उत्रिएको मच्छिन्द्र उच्च मनोबलमा देखिन्थ्यो ।

पहिलो हाफमै अग्रता बनाएको मच्छिन्द्रले दोश्रो हाफ पूर्ण नियन्त्रणमा राखेको थियो । सिराहाले दोश्रो हाफमा आकर्षक अवसर बनाउन सकेन । जीतपुरसिमरा गोल्डकपमा मच्छिन्द्र पहिलो सहभागिता मै फाइनल पुगेको छ ।

विमल प्लेयर अफ दि म्याच घोषित भए र शुभारम्भ कलेज म्यान अफ दि म्याचको ट्रफि सहित १० हजार रुपैयाँ प्राप्त गरे । उनलाई जीतपुरसिमरा उपमहानगरपालिकाका उपप्रमुख भोलाप्रसाद अधिकारी र शुभारम्भ कलेजका निर्देशक डा.राहुल झाले पुरस्कार प्रदान गरेका थिए । प्रतियोगितामा शनिबार पुलिस र एपिएफबीच दोस्रो सेमिफाइनल हुनेछ ।