काठमाडौं (हाम्रो खेलकुद) – सहिद स्मारक सि डिभिजन लिग अन्तर्गत बिहीबार सम्पन्न दुवै खेल बराबरीमा सकिएका छन् ।

एन्फा कम्प्लेक्स सातदोबाटोमा भएको दिनको पहिलो खेलमा खालिबारि युथ क्लब र महावीर क्लबले गोलरहित बराबरी खेलेका छन् । बराबरी सँगै खालीबारिले दोस्रो खेलमा पहिलो अंक हासिल गरेको छ । महावीरको भने यो दुई खेलमा दोस्रो बराबरी हो ।

यस्तै दिनको दोस्रो खेलमा सामाजिक युथ क्लब र सानेपा क्लबले १-१ को बराबरी खेलेका छन् । सम्भ्रान्त डंगोलले सानेपा क्लब्लाई नवौं मिनेटमा गोल गर्दै अग्रता दिलाएका थिए ।

तर सामाजिक युथ क्लबले ४४औं मिनेटमा योगेश श्रेष्ठको पेनाल्टी मार्फत खेलमा बराबरी गरेको थियो ।

सामाजिक युथ क्लबले र सानेपा क्लब दुवैले समेत यस सिजन पहिलो अंक हासिल गरेका छन् ।

सि डिभिजनमा भोलि दुई खेल हुने छन् । दिनको १ बजे हुने खेलमा समाज कल्याण स्पोर्ट्स सेन्टर र रानीवन स्पोर्ट्स क्लब भिड्ने छन् भने ४:१५ बजे हुने खेलमा स्वयम्भू क्लब र पुल्चोक स्पोर्ट्स क्लब भिड्ने छन् ।

सिंगल राउण्ड रोबिन ढाँचामा खेलाईने लिग विजेताले १० लाख रुपैयाँ पुरस्कार पाउने छ । दोस्रो हुने टोलीले ७ र तेस्रो हुने टोलीले ५ लाख पुरस्कार पाउने छ । यस्तै उत्कृष्ट खेलाडीको ५०,००० रुपैयाँ पाउने छन् भने उत्कृष्ट गोलकिपर र सर्वाधिक गोलकर्ताले जनही ३५,००० रुपैयाँ पाउने छन् ।