एजेन्सी – इंग्लिस प्रिमियर लिग अन्तर्गत आइतबार भएको खेलमा लिभरपुल र म्यानचेस्टर युनाइटेडले रोमान्चक बराबरी खेल्दै अंक बाँडेका छन् ।

युनाइटेडको घरेलु मैदान ओल्ड ट्राफर्डमा दुवै टोलीले अग्रता लिएपनि खेल २-२ को बराबरीमा टुंगियो । लिभरपुलले सुरुवाती अग्रता लिएपनि दोस्रो हाफमा युनाइटेडले २ गोल गर्दै अग्रता लिएको थियो । तर अन्त्यतिर लिभरपुल पेनाल्टीमा गोल फर्काउँदै अग्रता लिन सफल भयो ।

२३ औं मिनेटमा लुइस डियाजले लिभरपुललाई अग्रता दिलाएका थिए । कर्नरमा डार्विन न्युनेजले दिएको फ्लिक हेडरलाई डियाजले ६ यार्ड बक्स भित्रबाट गोल गरेका थिए । लिभरपुलले त्यसपछि अग्रता बढाउने अवसर पाएपनि मोहमद सलाह २ अवसरमा चुके ।

दोस्रो हाफको ५० औं मिनेटमा युनाइटेडका लागि ब्रुनो फर्नान्डेसले बराबरी गोल फर्काए । लिभरपुलका डिफेन्डर बेन क्वान्साले मैदानको मध्य भागमा दिएको पासलाई ब्रुनोले ठम्याएर पहिलो टचमै दर्शनीय गोलमा परिणत गरे ।

६७ औं मिनेटमा कोबी माइनुले घरेलु टोलीलाई अग्रता दिलाए । पेनाल्टी क्षेत्र भित्रबाट उनले सानदार गोल गर्दै युनाइटेडलाई २-१ ले अघि बढाएका थिए । तर ८४ औं मिनेटमा मोहमद सलाहले पेनाल्टीमा बराबरी गोल गरे ।

यस बराबरीले लिभरपुल अंक तालिकाको शीर्ष स्थानमा उक्लनबाट बन्चित भयो । लिभरपुलको ३१ खेलमा ७१ अंक छ । युनाइटेड ३१ खेलमा ४९ अंकसहित छैटौं स्थानमा रहेको छ । आर्सनल ७१ अंकका साथ शीर्षस्थानमा रहँदा म्यानचेस्टर सिटी ७० अंक जोड्दै तेस्रोमा छ । एस्टन भिल्ला ६० र टोटेनहम ५७ अंकका साथ शीर्ष ५ मा छन् ।