काठमाडौं (हाम्रो खेलकुद) – आरसी ३२ फुटबल एकेडेमीले आज देखि सुरु भएको सहिद स्मारक सि डिभिजन लिगमा विजयी सुरुवात गरेको छ । एन्फा कम्प्लेक्स सातदोबाटोमा भएको उद्दघाटन खेलमा आरसी ३२ले खालिबारी युथ क्लब माथि १-० को जित निकालेको हो ।

आरसी ३२ को जितमा बबिन बोहोराले खेलको २२औं मिनेटमा गरेको गोल नै निर्णायक बन्यो । टिप्सन राईले गरेको क्रसमा बबिनले गोल गर्दै टोलीलाई अग्रता दिलाएका थिए ।

६६औं मिनेटमा आरसी ३२ ले अग्रता दोब्बर गर्ने मौका गुमाएको थियो । खालिबारीका गोलकिपर मनोज तामाङले विल्सन गिरी माथि फाउल गरेपछि पाएको पेनाल्टी मनोजले बचाउन पुगे । विवेक सन्तोषीले प्रहार गरेको पेनाल्टी उनले बचाएपछि क्रसबारमा लागेर फर्किएको थियो ।

८५औं मिनेटमा खालीबारीले पनि पेनाल्टी मार्फत बराबरी गर्ने अवसर पाएको थियो । सुमन मगरले मनिष गुरुङ माथि गरेको फाउलले गर्दा पाएको पेनाल्टीमा रोनल राईले पोस्ट भन्दा बाहिर प्रहार गरे ।

भोलि सि डिभिजनमा दुई खेल हुँदै छन् । दिनको १ बजे हुने खेलमा सानेपा क्लब र बागमती युथ क्लब भिड्ने छन् । बेलुका ४:१५ बजे हुने खेलमा रानीवन स्पोर्ट्स क्लान र महावीर स्टडिज एण्ड एथ्लेटिक्स एसोसिएसन भिड्ने छन् ।

सिंगल राउण्ड रोबिन ढाँचामा खेलाईने लिग विजेताले १० लाख रुपैयाँ पुरस्कार पाउने छ । दोस्रो हुने टोलीले ७ र तेस्रो हुने टोलीले ५ लाख पुरस्कार पाउने छ । यस्तै उत्कृष्ट खेलाडीको ५०,००० रुपैयाँ पाउने छन् भने उत्कृष्ट गोलकिपर र सर्वाधिक गोलकर्ताले जनही ३५,००० रुपैयाँ पाउने छन् ।