सन्तोषको ह्याट्रिकले थ्रि स्टार विजयी

मोरङ, असोज ७

एक गोलले पछि परेको स्थितिलाई उल्टाउँदै थ्रि स्टारले जारी रेडबुल राष्ट्रिय लिगमा मोरङ फुटबल क्लबलाई ४-१ले पराजित गरेको छ|

मोरङको लक्ष्मीनगर रंगशालामा भएको खेलमा मोरङले पहिलो गोल गर्यो| मोरङ्का लागि २८औं मिनेटमा स्ट्राइकर टेक बहादुर लिम्बुले अग्रता दिलाएका थिए| खेलभर आक्रमक रुपमा उत्रिएको थ्रि स्टारले हाफ टाइम नजिकिंदै गर्दा बराबरी गोल फर्काउन सफल भयो| ललितपुरे क्लबका लागि विदेशी खेलाडी ओलावाले आफिजले पहिलो हाफको अतिरिक्त समयको दोश्रो मिनेटमा गोल गरेर खेल १-१को बराबरीमा ल्याएका थिए|

दोश्रो हाफ सुरुभएसंगै थ्रि स्टारको अट्याक पनि बढ्दो थियो| यसैक्रममा ७७औं मिनेटमा सन्तोष साहुखलले गोल गर्दै टिमलाई अग्रता दिलाए| खेलको अन्तिम समयतिर दुई गोल थप्दै साहुखलले ह्याट्रिक पुरा गरे| यससंगै उनले घरेलु लिगमा १०० गोलको कोशेढुंगा पार गरेका छन्| मोरङ विरुद्ध उनले गरेको गोल १००औं थियो भने ९०+४औं मिनेटको १०१औं|

यस जितसंगै थ्रि स्टार अंक तालिकाको शिर्ष स्थानमा पुग्न सफल भएको छ|