विराटनगर (हाम्रो खेलकुद)-  सिक्किम ड्रागन आठौं विराट गोल्डकप फुटबल प्रतियोगिताको सेमिफाइनलमा पुगेको छ ।

विराटनगरको सहिद रंगशालामा आइतबार ए डिभिजन टोली एनआरटीलाई थप समयमा २-१ ले पराजित गर्दै सिक्किम अन्तिम चारमा पुगेको हो। आर्दश तामाङले थप समयको अन्त्यतिर गोल गर्दै सिक्किमलाई जित दिलाए थिए।

निर्धारित समय १-१ को बराबरीमा टुंगिएको थियो। खेलमा लिएको अग्रतालाई एनआरटीले जोगाउन सकेन।
एनआरटीका अफिज ओलावालेले ४० औं मिनेटमा निकालेको पास शिशीर लेखीले गोल गर्दै टोलीलसई अघि बढाएका थिए ।

सिक्किम दोस्रो हाफबाट आक्रमक बन्यो र ५९ औ मिनेटमा खेल बराबरी गर्न सफल रह्यो। सिक्किमका ह्यारिसनले गोल गरेका थिए। लाक्पा शेर्पाले मैदानको मध्यभागबाट निकालेको पासलाई ह्यारिसनले पेनाल्टी बक्स भित्रबाट गोल गरेका थिए।

थप ३० मिनेटको २९ औं मिनेटमा आर्दशले गोल गरेपछि त्यहि गोल नै खेलको निर्णायक बनेको थियो।
सिक्किमका जसमान गुरुङलाई एनआरटीका खेलाडीले फाउल खेलेपछि रेफ्री श्रवण लामाले फ्रिकिक दिएका थिए । त्यहि फ्रिकिकमा आर्दशले गोल गरेका थिए । आर्दश प्लेयर अफ द म्याच घोषित भए र ११ हजार रुपैयाँ पाए ।

एनआरटीको प्रशिक्षक जीवन सिङकेमनले खेलाडीहरुबीच आन्तरिक तालमेल नमिलेको कारण पराजय भोग्नु परेको बताए । ‘आइतबार दुई जना खेलाडी काठमाण्डौ जानुपर्ने बाध्यता पनि भयो । दुई खेलाडी नभएको कारणले पनि हार भयो,’ उनले भने ।

सिक्किमका प्रशिक्षक कुन्जन भुटियाले खेलाडीहरुले उत्कृष्ट प्रर्दशन गरेकाले जित सम्भाव भएको बताए ।
प्रतियोगितामा सोमबारको खेल इटहरी गोल्डकपको विजेता चर्च व्वाईज युनाइटेड र एपिएफ फुटबल क्लबबीच हुनेछ ।