एजेन्सी – लेस्टर सिटी विरुद्ध जित निकाल्दै चेल्सी एफए कपको सेमीफाइनलमा प्रवेश गरेको छ । आईतबार साँझ भएको खेलमा चेल्सीले दश जनामा सिमित लेस्टर विरुद्ध ४-२ को जित निकालेको हो ।

खेलको १३औं मिनेटमा चेल्सीले खेलमा सुरुवाती अग्रता लिएको थियो । निकोलस ज्याक्सनको पासमा मार्क कुकुरेलाले गोल गर्दै खेलमा सुरुवाती अग्रता दिलाएका थिए ।

२६औं मिनेटमा चेल्सीले पेनाल्टी मार्फत अग्रता दोब्बर गर्ने मौका पायो । फकुवुले स्टर्लिङ माथि फाउल गरेपछि चेल्सीले पेनाल्टी पाएको थियो । तर स्टर्लिङले नै लिएको सो पेनाल्टी लेस्टर गोलरक्षक याकूब स्टोलारजिकले बचाए ।

पहिलो हाफको अन्त्यतिर भने स्टर्लिङले असिस्ट गरे । उनको पासमा कोल पालमरले चेल्सीको अग्रता दोब्बर बनाए ।दोस्रो हाफमा भने लेस्टर खेलमा फर्कियो । ५१औं मिनेटमा एलेक्स डिसासीको आत्मघाती गोल र ६२औं मिनेटमा स्टेफी मभिडिडीको गोलमा लेस्टरले खेलमा दुई गोल पछाडी रहेको अवस्थाबाट बराबरी गर्न सफल भयो ।

तर खेलको ७३औं मिनेटमा लेस्टरका क्यालम डोएल रातो कार्ड खाँदै मैदान बाहिरिएपछि लेस्टर १० जनामा सिमित भयो । त्यसको फाइदा उठाउँदै चेल्सीको खेलको अन्त्यतिर दुई गोल गर्दै जित हासिल गर्यो ।

इञ्ज्युरी समयको दोस्रो मिनेटमा पालमरको पासमा कार्नी चुक्वुमेकाले गोल गर्दै चेल्सीलाई खेलमा अघि सारे । त्यसको छ मिनेट पछि नोडी मडुएकेले उत्कृष्ट गोल गर्दै चेल्सीको अन्तिम चारमा स्थान सुरक्षित गरे ।