एजेन्सी – विंगर जमल मुसिएलाले दुई गोलसँगै एक असिस्ट प्रदान गरेपछि बायर्न म्युनिखले सानदार पूनरागमन जित निकाल्दै जर्मन बुन्डेस लिगाको शीर्षस्थानमा रहेको बायर लिभरकुसनसँगको अंक दुरी छोट्याएको छ ।

बायर्नले एक गाेलले पछि परेकाे स्थितिमा पुछारमा रहेको एसभी ड्राम्सटाडमाथि ५–२ को सानदार पूनरागमन जित निकाल्दै लिभरकुसनसँगको अंक दुरी ७ मा मा झारेको छ । यद्दपि अपराजित रहेको लिभरकुसनले एक खेल कम खेलेको छ ।

बायर्नको जितमा जमल मुसिएलाले दुई तथा ह्यारी केन, सर्ज नाब्री र म्याथिज टेलले समान एक गोल गरे । ड्राम्सटाडका टिम स्कार्क र ओस्कार भिल हेल्मसनले गोल फर्काए ।

ड्राम्सटाडमा शनिबार राति भएको खेलको २८औं मिनेटमा टिम स्कार्कको गोलबाट बायर्न खेलमा पछि परेको थियो । ३६औं मिनेटमा मुसिएलाले गोल गर्दै खेललाई १–१ गोलको बराबरीमा ल्याएपछि बायर्न खेलमा फर्कियो । पहिलो हाफको इन्ज्युरी समयको थप गरिएको पहिलो मिनेटमा ह्यारी केनले गोल गर्दै बायर्नलाई खेलमा २–१ को अग्रता दिलाए ।

६४औं मिनेटमा मुसिएलाले व्यक्तिगत दोस्रो तथा टोलीका लागि तेस्रो गोल गरेपछि बायर्नले खेलमा ३–१ को अग्रता लिएर सहज जिततर्फ अग्रसर बन्यो । बायर्न यतिमै रोकिएन । ७४औं मिनेटमा सर्ज नाब्रीले गोल गर्दै बायर्नलाई खेलमा ४–१ ले अघि बढाए ।

इन्ज्युरी समयको थप गरिएको तेस्रो मिनेटमा म्याथिजले गोल गर्दै बायर्नलाई ५–१ ले अघि बढाए । इन्ज्युरी समयको थप गरिएको पाँचौं मिनेटमा ओस्कार भिलहेल्मसनले गोल गर्दै खेललाई ५–२ को स्थितिमा ल्याए ।

यस जितल बायर्नको २६ खेलबाट ६० अंक पुगेको छ । एक खेल कम खेलेको लिभरकुसनको ६७ अंक छ । पराजित एसभी ड्राम्सटाड १३ अंक जोडेर पुछारमा छ ।