अर्जुन कार्की, बागलुङ

बागलुङ सुधार केन्द्र र श्रीमेहर गण दोस्रो अर्ना जेसीज कप फुटबल प्रतियोगिताको उपाधिका लागि भिड्ने भएका छन् ।

बिहिबार भएको सेमिफाइनलमा बागलुङ सुधारले वरदान निउरेको निर्णायक गोलमा रुद्रेपिपल युवा क्लबलाई २–१ ले हराउँदै फाइनलमा पुगेको छ । विदेशी खेलाडी साम्बो ओस्कारले ४७ औं मिनेटमा बागलुङ सुधारका लागि गोल गरे । आशिष केसीकौ फ्रिकिकमा ओस्कारले गोल गरेका हुन् ।

रुद्रेपिपलका अभिषेक गुरुङले ५७ औं मिनेटमा बराबरी गोल गरे । अभिषेकले विपक्षी गोलकिपर र दुई डिफेन्डरलाई विट गर्दै बराबरी गोल गरेका हुन् । खेलको ८० औं मिनेटमा वरदानले ओस्कारको पासमा गोल गर्दै टोलीलाई जित दिलाए ।

नेपाली सेनाको श्रीमेहर गणले रामशरण चौधरीको निर्णायक गोलमा आदर्श स्पोर्टस् क्लबलाई २–१ ले हराउँदै अन्तिम दुईमा पुगेको थियो । दोस्रो मिनटेमा प्रकाश निरौलाको गोलमा श्रीमेहरले अग्रता लियो ।

१९ औं मिनेटमा आदर्शका सुरेन्द्र गुरुङले बराबरी गोल गरे । ७९ औं मिनेटमा श्रीमेहरका रामशरणको गोल निर्णायक ब्रन्यो । फाइनल शुक्रबार हुने आयोजक बागलुङ जेसीजका अध्यक्ष गणेश महतोले बताए ।

प्रतियोगिताको विजेता टोलीले १ लाख ५५ हजार ५ सय ५५ र दोस्रो हुने टोलीले ७५ हजार ५ सय ५५ रुपैयाँसहित प्राप्त गर्नेछ । सेमिफाइनलमा पराजित दुई टोलीले १५ हजार रुपैयाँ प्राप्त गर्नेछन् ।