अर्जुन कार्की, बागलुङ

दोस्रो ‘अर्ना जेसीज कप’ फुटबल प्रतियोगिताको सेमिफाइनल समीकरण पूरा भएको छ । रुद्रेपिपल युवा क्लब र आदर्श स्पोर्टस् क्लबले बुधबार जित निकाल्दै अघिल्लो चरणको यात्रा तय गरेसँगै सेमिफाइनल समीकरण पूरा भएको हो । बागलुङ सुधार केन्द्र र श्रीमेहर गण यसअघि नै सेमिफाइनल पुगिसकेका छन् ।

बुधबार क्वारटफाइनलमा रुद्रेपिपलले बुद्धचित्त फुटबल क्लबलाई पेनाल्टी सुटआउटमा ४–३ गोलअन्तरले हराएको थिया । निर्धारित ८० मिनेटको खेल १–१ गोलको बराबरीपछि खेल पेनाल्टी सुट आउटमा भएको थियो ।

खेलको १४ औं मिनेटमा अभिषेक गुरुङको गोलमा रुद्रेपिपलले अग्रता लिएको थियो । बुद्धचित्तका आशिष रोका मगरले इन्ज्युरी समयमा गोल गर्दै खेललाई १–१ को बराबरीमा पु¥याए ।

पेनाल्टी सुटआउटमा रुद्रेपिपलका अर्जुन मगर, अमृत कुँवर, मनिष क्षेत्री र भिषण गुरुङले गोल गरेपनि रोशन लामिछानेको प्रहार बाहिरिएको थियो ।

बुद्धचित्तका कमल थिंग, आशिष राना मगर र कोपिल छन्त्यालले गोल गरे । फिराज घिमिरे र अंकित गुरुङको बल रुद्रेपिपलका गोलरक्षक सन्दिप क्षेत्रीले रोकेका थिए ।

अन्तिम क्वाटरफाइनल खेलमा आदर्श स्पोर्टस् क्लबले धवलागिरी बहुमुखी क्याम्पसलाई ५–० ले हरायो । पाँचौं मिनेटमा विदेशी खेलाडी फिलिप्स भिक्टरले गोल गर्दै आदर्शलाई अग्रता दिलाएका थिए ।

आदर्शको लागि खेलको १० औं मिनेटममा रिजन पुन र २० औं मिनेटमा सुरेन्द्र गुरुङले गोल गर्दै पहिलो हाफमा ३–० को अग्रता दिलाए । भिक्टरले खेलको ४५ औं मिनेटमा व्यक्तिगत दोस्रो र युवराज ढकालले ६७ औं मिनेटमा गोल गरेका थिए ।

बागलुङ जेसीजले आयोजना गरेको प्रतियोगितामा बिहिबार सेमिफाइनल खेल हुने । पहिलो खेल बागलुङ सुधार र रुद्रेपिपल तथा दोस्रो खेल श्रीमेहर गण र आदर्श स्पोर्टस्बीच हुनेछ ।