काठमाडौं (हाम्रो खेलकुद) – नेपाली राष्ट्रिय फुटबल टोलीले अर्को साता विश्वकप छनोटको दोस्रो चरण अन्तर्गत बहराइनको सामना गर्दैछ । मलेसियासँग मैत्रीपूर्ण खेल खेलेर खेलको तयारी गर्न प्रशिक्षक भिन्सेन्जो अल्बर्टो अनेसेले २३ सदस्यीय अन्तिम टोली घोषणा गरे ।

यसपटक टोलीमा स्टार विंगर आयुष घलान र दोस्रो रोजाइका गोलरक्षक दीप कार्की भने परेनन् । प्रारम्भिक छनोटको सुचिमा नाम रहेपनि आयुष र दिप दुवै बन्द प्रशिक्षणमा सहभागी नभएपछि बहराइन प्रस्थान नगर्ने भएका छन् । नियमित गोलरक्षक किरण चेम्जोङ मलेसियाविरुद्ध उपस्थित हुने नहुने प्रष्ट नभएको अवस्थामा दिप पनि नहुँदा अब अभिषेक बराल र विशाल सुनारमध्य एकले अवसर पाउने देखिन्छ ।

यता आयुष घलान नहुँदा आक्रमणमा दिनेश हेन्जन र मनिष डाँगीले दुई विंगमा खेल्ने बलियो सम्भावना छ । यसबाहेक प्रशिक्षक अनेसेले हिसुब थपलिया र भरत खवासको रुपमा पनि विकल्प पाएका छन् । सेन्टर फरवार्डमा अन्जन विष्टले खेल्न सक्छन् । अन्जनलाई विंगको विकल्पमा प्रयोग गरे जिलेस्पी जंग कार्की र समिर तामाङ मध्यभागमा खेल्न सक्छन् ।

प्रशिक्षक अनेसेले आयुष र दिपको अनुपस्थितिबारे व्यक्तिगत कारण रहेको बताए । ‘आयुष र दिप बन्द प्रशिक्षणमा सामेल भएनन् । दुवैले आ-आफ्नो व्यक्तिगत कारण बताएका थिए । मैले दुवैको निर्णयलाई सम्मान गर्नुपर्छ । यो कुरालाई यहि अन्त्य गर्न चाहन्छु,’ उनले भने ।

एरिक विष्टलाई भने भारतीय लिगमा खेलिरहेका कारण उनको क्लब करिअरलाई अघि बढाउन समय दिएको अनेसेले बताए । यसबाहेक उनले आयुष र मनिष डाँगीले क्लबमा अवसर नपाएको र राष्ट्रिय टोली प्रशिक्षणमा थप मिहिनेत गर्ने बताए ।

‘आयुषको कुरा गर्नुपर्दा उनले पछिल्लो समय खास खेल्ने समय पाएका छैनन् । सुरुवात नगरेर बेन्चमा रहेका छन् । मच्छिन्द्रको बेन्चमा छन् र १५-२० मिनेट मात्र समय बिताएका छन् । मनिषको पनि त्यस्तै स्थिति छ । तर यहाँ प्रशिक्षणमा त्यसलाई सन्तुलन गर्ने प्रयास गरिरहेका छौं,’ उनले भने ।

प्रशिक्षक अनेसेले यसबारे थप खुलेर बोल्न भने चाहेनन् । उनले टोलीमा रहेका नयाँ खेलाडीका लागि अवसर रहेको र मलेसियाविरुद्ध मैत्रीपूर्ण खेलले थप प्रष्ट पार्ने अभिव्यक्ति दिए ।

अनेसेले घरेलु मैदानमा खेल्न नपाउँदा दुख पनि व्यक्त गरे । ‘सर्वप्रथम त म समर्थकहरुसँग माफी माग्न चाहन्छु । तर यो अवस्था मैले गर्दा सिर्जना भएको होइन, एन्फाका अधिकारीसँग यसको उत्तर होला । खेलाडीहरुका लागि यो कठिन होला, तर अब यसको सामना गर्नुको विकल्प छैन । र हामी सक्दो प्रयास गर्नेछौं,’ अनेसेले भने ।

टोलीका सबैभन्दा अनुभवी डिफेन्डर रोहित चन्द नहुँदा टोलीमा असर पर्ने पनि उनले बताए । ‘सबैभन्दा पहिला रोहित र रोहितको परिवारप्रति समवेदना प्रकट गर्छु । यो समय निकै कठिन छ । हामीलाई उनको अनुभव सबैभन्दा बढी खड्कने देख्छु । उनले टोलीमा डिफेन्डर मात्र नभएर नेतृत्व प्रदान गर्थे, त्यो मिस हुनेछ,’ इटालियन प्रशिक्षकले थपे ।

सुरुवाती २ खेलमा हार बेहोरेको नेपाल आगामी दुई खेलमा बहराइनसँग पराजित भए अंक तालिकाको पुछारमा नै अड्कनेछ । नेपालका लागि वातावरणको हिसाबले पनि कठिन मानिने मध्य पूर्वमा नेपालले लगातार दुई खेल खेल्न पक्कै सहज हुने छैन । त्यसमाथि अहिलेको टोलीलाई कागजी रुपमा हेर्दा हालसम्मकै कमजोर मान्न सकिन्छ ।

नेपाली फुटबल टोली

गोलकिपर – किरण चेम्जोङ, अभिषेक बराल, विशाल सुनार

डिफेन्डर – अभिषेक लिम्बु, अजय चौधरी, अनन्त तामाङ, छिरिङ लामा, सनिश श्रेष्ठ, सौभाग्य राई (सन्जित), सुमित श्रेष्ठ

मिडफिल्डर – भरत खवास, विशाल बस्नेत, लाकेन लिम्बु, मणिकुमार लामा, मनिष डाँगी, रोहन कार्की, उत्सव राई

फरवार्ड – अन्जन विष्ट, दीनेश हेन्जन, हिसुब थपलिया, समिर तामाङ, सन्जिव विष्ट, जिलेस्पी जंग कार्की

यो पनि :

राष्ट्रिय टोलीका दुवै गोलरक्षक प्रशिक्षक टिमसँग जाने!

फुटबल टोलीसँग एन्फाका थप १० जना मलेसिया जाँदै!