सुशिल पन्त क्षेत्री ,चितवन
एपिएफ भण्डारा सेन्ट्रल कलेज प्रथम भरतपुर फुटबल च्याम्पियनसिपको क्वाटरफाइनलमा प्रवेश गरेको छ ।

सोमबार सम्पन्न समूह चरणको अन्तिम खेलमा कैलाश युथ क्लबलाई २-१ ले हराउँदै एपिएफले क्वाटरफाइनलमा स्थान सुरक्षित गरेको हो ।

नेपाल प्रहरी शिक्षालयको मैदानमा भएको खेलमा एपिएफलाई जिताउज सुजन लामा र माइकल शाहीले गोल गरे । कैलाशका राहुल थापा मगरले एक गोल फर्काए ।

खेलको तेस्रो मिनेटमा नै एपिफले पेनाल्टी पाएको थियो । उक्त अवसरको सदुपयोग गर्दै सुजनले बललाई जाली चुमाए । तर एपिएफको त्यो अग्रता धेरै समय टिकेन । १५ औं मिनेटमा राहुलको गोलमा कैलाश खेलमा फर्कियो ।

पहिलो हाफको अतिरिक्त समयमा माइकलले गोल गर्दै एपिएफलाई २-१ को अग्रता दिलाए ।
एपिएफका माइकल म्यान अफ दि म्याच भए ।

एपिएफले चैत ३ गते क्वाटरफाइनलमा गैंडाकोट एफसीको सामना गर्नेछ । प्रतियोगितामा मंगलबार कुनै खेल छैन । यससँगै पहिलो चरणका खेलहरु सकिएका छन् ।

चितवन ११ फुटबल क्लबको आयोजनामा जारी प्रतियोगितामा बुधबारबाट क्वाटरफाइनलका खेलहरु सुरु हुनेछ । पहिलो क्वाटरफाइनलमा बिहीबार चौकीडाँडा पोलका हेटौंडा फुटबल एकेडेमी र २८ बिघा भिड्नेछन् ।

चैत १० गतेसम्म चल्ने प्रतियोगिताको विजेताले ३ लाख ३ हजार तथा दोस्रोले १ लाख ५० हजार रुपैयाँ प्राप्त गर्नेछ । भरतपुर भ्रमण वर्ष २०२४ को अवसरमा प्रतियोगिता आयोजना गरिएको हो ।