दिपक बोहोरा, पाँचथर

चौथो पाँचथर गोल्ड कप फुटबल प्रतियोगितामा झण्डै १२ लाख रुपैयाँको टिकट विक्री भएको छ । शनिबार सम्पन्न पाँचथर गोल्ड कपमा टिकट विक्रीबाट कुल ११ लाख ७९ हजार २ सय ५० रुपैयाँ संकलन भएको आयोजक पाँचथर क्लबले आफ्नो फेसबुकमार्फत जानकारी दिएको छ ।

सर्व साधरणलाई खेल हेर्न प्रवेश शुल्कवापतको टिकटबाट सो रकम संकलन भएको हो । फागुन १६ गते पाँचथर र बागमती युथ क्लब सर्लाहीबीच भएको पहिलो सेमिफाइनलमा १ लाख १६ हजार ७ सय ५० रुपौयाँ तथा त्रिभुवन आर्मी फुटबल क्लब र झापा ११ फागुन १७ गते भएको सेमिफाइनलमा १ लाख ५६ हजार रुपैयाँ संकलन भएको जनाइएको छ ।

त्यस्तै फागुन १९ गते पाँचथर र आर्मीबीच भएको फाइनलको टिकट विक्रीबाट ६ लाख ३० हजार रुपैयाँ संकलन भएको आयोजक क्लबका सचिव योगराज सेढाईले जानकारी दिए । क्वार्टरफाइनलमा १ सय ५०, सेमिफाइनलमा २ सय तथा फाइनलमा ३ सय रुपैयाँ टिकट दर तोकिएको थियो । खेलमा वृद्धवृद्धा, बालबालिका तथा अशक्तका लागि भने निःशुल्क प्रवेशको व्यवस्था गरिएको थियो ।

८ टोलीको सहभागिता रहेको प्रतियोगितामा भएको आयव्यय विवरण केहि दिनमा सार्वजनिक गरिने क्लबका सचिव सेढाईले जानकारी दिए । आयोजक टोलीलाई हराउँदै आर्मीले उपाधि जितेको थियो । विजेता टोलीले ५ लाख ५ हजार र दोस्रो पाँचथरले २ लाख ५५ हजार रुपैयाँ प्राप्त गरेको थियो ।