एजेन्सी – इंग्लिस प्रिमियर लिगमा न्यूक्यासल युनाइटेडले सानदार जित दर्ता गर्दा लन्डन क्लब चेल्सी बराबरीमा रोकिएको छ ।
न्यूक्यासलले घरेलु मैदानमा वल्भ्समाथि ३–० को जित दर्ता गरेको हो ।

सेन्ट जेम्स पार्कमा शनिबार राति भएको खेलमा घरेलु टोलीको जितमा एलेक्सान्डर इसाक, एन्थोनी गोर्डन र भालेन्टिनो लिब्रामेन्टोले गोल गरे ।

१४औं मिनेटमा इसाकको गोलबाट अग्रता लिएको न्यूक्यासलले ३३औं मिनेटमा एन्थोनी गोर्डनको गोलबाट पहिलो हाफमा २–० को अग्रता बनाउन सफल भएको थियो । त्यसपछि इन्ज्युरी समयको थप गरिएको दोस्रो मिनेटमा भालेन्टिनो लिब्रामेन्टोले गोल गर्दै न्यूक्यासलको सहज जित पक्का गराए ।

यस जितले न्यूक्यासल २७ खेलबाट ४० अंक जोडेर आठौं स्थानमा उक्लिएको छ । पराजित वल्भ्स ३८ अंकसहित १०औं स्थानमा छ ।

प्रिमियर लिगकै अर्काे खेलमा चेल्सीले ब्रेन्टफर्डसँग २–२ गोलको बराबरी खेलेको छ । ब्रेन्टफर्डका म्याड्स रोरस्लेभ र योएनी विसाले गोल गर्दा चेल्सीका निकोलस ज्याक्सन र एक्सेल डिसासीले बराबरी गोल फर्काए ।

खेलमा सुरुवाती अग्रता भने चेल्सीले लिएको थियो । ब्रेन्टफर्डमा शनिबार राति भएको खेलको ३५औं मिनेटमा ज्याक्सनको गोलबाट चेल्सीको अग्रता बनाएको थियो । उनले मालो गुट्सोको पासमा गोल गर्न सफल भएका थिए ।

५०औं मिनेटमा म्याड्सले गोल गर्दै खेललाई १–१ गोलको बराबरीमा ल्याए । ६९औं मिनेटमा योएनी विसाले गोल गरेपछि चेल्सी खेलमा २–१ ले पछि पर्यो । तर, हार नमानेको चेल्सीले ८३औं मिनेटमा डिसासीको गोलबाट खेललाई २–२ गोलको बराबरीमा ल्याउन सफल भयो ।

यस बराबरीले चेल्सी २६ खेलबाट ३६ अंक जोडेर ११औं स्थानमा यथावत छ । ब्रेन्टफर्ड २७ खेलबाट २६ अंक जोडेर १५औं स्थानमा छ ।